ჩავის პრესკონფერენცია ბილბაოსთან მატჩის წინ

“ატლეტიკთან” თამაში ჩვენგან ბევრის გაღებას მოითხოვს, ეს ძალიან ინტენსიური, ახალგაზრდებით დაკომპლექტებული გუნდია, რომელსაც ესპანეთში ერთ-ერთი საუკეთესო მწვრთნელი ჰყავს. წილისყრაში არ გაგვიმართლა.

დემბელე? ჩვენ ძალიან კომპლექსურ და რთულ სიტუაციაში ვართ. ორი გამოსავალია: უსმანმა ან კონტრაქტი უნდა გაახანგრძლივოს, ან კლუბი უნდა დატოვოს. ჩვენ ეს გადაწყვეტილება მივიღეთ.

მე მას მეტ ნდობას ვერ მივცემ. მას უპირატესობა აქვს და ყველაფერი თავად უნდა გადაწყვიტოს.

ხვალ გვეცოდინება, მოხვდება თუ არა დემბელე განაცხადში.

კრიტიკა ბუსკეტსის მიმართ? მან იცის, რომ შეცდომა დაუშვა, თუმცა ის შესანიშნავი ფეხბურთელია, სერხიო ჩვენი თამაშისთვის ძალიან მნიშვნელოვანია. თუ გუნდი ძლიერია, ბუსკეტსი მსოფლიოში ერთ-ერთი საუკეთესოა.

დემბელე მეუბნება, რომ კონტრაქტის გახანგრძლივება და კარიერის “ბარსელონაში” გაგრძელება სურს. მე მკაფიო პოზიცია მაქვს: ის ან გაახანგრძლივებს, ან გამოსავალი უნდა მოიძებნოს, რადგან საბოლოოდ გადაწყვეტილება კლუბის ინტერესებიდან გამომდინარე უნდა მივიღოთ. 

ფატიმ გასულ წელს ცოტა ითამაშა და ჩვენ ის ნელ-ნელა უნდა დავტვირთოთ. ანსუ ვარსკვლავია, მას გოლის გატანის ალღო აქვს და განსხვავების შექმნა შეუძლია. ის შესანიშნავი მოთამაშეა. 

მისი პოზიცია? ეს იმაზე იქნება დამოკიდებული, რომელი ფეხბურთელები გვეყოლება ხელმისაწვდომი. ანსუს ფლანგსა და ცენტრში თამაში შეუძლია. ვნახავთ, როგორ ფიზიკურ მდგომარეობაში იქნება.

დემბელეს აგენტის სიტყვები? მე მიკვირს, როგორ შეიძლება, უსმანი ამბობდეს, რომ გახანგრძლივება სურს, მისი აგენტი კი იმას ამბობდეს, რაც გუშინ თქვა.

ფეხბურთელმა ცოტათი კლუბზეც უნდა იფიქროს.

უსმანს ჩემთვის იმედი არ გაუცრუებია. 

ფერან ტორესმა ამ კვირაში ძალიან კარგად ივარჯიშა. მას “ელ კლასიკოში” რითმის შეგრძნება აკლდა, მაგრამ ის კარგადაა, 100%-ით გამოჯანმრთელდა და ხვალ მნიშვნელოვანი ძალა უნდა იყოს.

მე ყოველთვის ოპტიმისტურად ვარ განწყობილი. თუ ფეხბურთელები დაგვიბრუნდებიან, ეს უფრო პოზიტიურს გამხდის. გუნდში კარგი შეგრძნებებია, მაგრამ შედეგის კუთხით მოვიკოჭლებთ. უფრო კონკურენტუნარიანები უნდა ვიყოთ; მე ყოველდღიურ გაუმჯობესებას ვხედავ, რაც ოპტიმიზმის საფუძველს მაძლევს.

 ბილბაოს “ატლეტიკს” დიდ პატივს ვცემ. ისინი ძალიან მაღალ დონეზე მუშაობენ, მათი სტადიონი საუცხოოა, იქ დაბრუნებით მოხარული ვარ. 

პედრი 100%-ით გამოჯანმრთელებულია და ის მნიშვნელოვანი უნდა იყოს, მისი და ანსუს დაბრუნება აუცილებელი იყო. ისინი არიან ფეხბურთელები აწმყოსა და მომავლისთვის და გუნდისთვის საკვანძო ნაწილს წარმოადგენენ.

არაუხოსთან კონტრაქტის გახანგრძლივება პრიორიტეტია. ის არაჩვეულებრივია მცველია. შეთანხმება მნიშვნელოვანია, რადგან ის აწმყოსა და მომავლისთვის აუცილებელი მოთამაშეა.

ბრეითუეიტი კარგად მუშაობს, ხვალ ვნახავთ, მოხვდება თუ არა ის განაცხადში. მარტინმა ვადები შეამცირა. ის არის ფეხბურთელი რომელსაც ჩვენი დახმარება შეუძლია, მას წუთების მიღება შეუძლია.

ალვესი მაღალ დონეს აჩვენებს. ის მნიშვნელოვანი ფიგურაა და ასეც გაგრძელდება.

მემფისს მცირე დისკომფორტი აქვს, ის მცირედ დაშავდა, თუმცა სერიოზული არაფერია. გადაწყვეტილებას ხვალ მივიღებთ.

წესები გასახდელში? პატივისცემა, დამოკიდებულება, შრომა, ძალისხმევა, სოლიდარობა, გასახდელში ერთ ოჯახად ყოფნა. ეს წესრიგის საკითხია, მეტი არაფერია სათქმელი, საქმეს კარგად ვუძღვებით. ჩვენ ვალდებულები ვართ, გავიმარჯვოთ, მაგრამ ღირებულებებზე ვერავინ იდავებს. 

ფორვარდების პასუხისმგებლობა? გადაწყვეტილებების მიღება მნიშვნელოვანია. წინა ხაზში პასუხისმგებლობით უნდა ვიმოქმედოთ, რათა მეტოქემ კონტრშეტევები არ განახორციელოს. ჩვენ უნდა ვიცოდეთ, როდის შევუტიოთ, როდის ავიღოთ მეტი პაუზა ან როდისაა დომინირების დრო.

მსოფლიო ჩემპიონატამდე თითქმის ერთი წელი დარჩა და ფეხბურთელები მასზე ჯერ არ ფიქრობენ. 

ესპანეთის ნაკრების კატალონიაში დაბრუნება ძალიან კარგია. ეს ბოლოს 2004 წელს მოხდა და ახლა ძალიან სასიამოვნოდ მესახება. დღეს ამაზე ბუსკეტსთან ვისაუბრე.