ბარსელონა-ინტერი – მსაჯი ცნობილია

ჩემპიონთა ლიგის ჯგუფური ეტაპის მე-4 ტურის მსაჯები ცნობილია. UEFA-ს გადაწყვეტილებით “ბარსელონასა” და “ინტერის” დაპირისპირებას პოლონელი შიმონ მარცინიაკი განსჯის.

მარცინიაკი 41 წლისაა. ის უკვე 20 წელია, მსაჯობს, 2011 წლიდან კი FIFA-ს არბიტრია.

კარიერის განმავლობაში საერთაშორისო მატჩებში პოლონელი თამაშში საშუალოდ 26.8 ჯარიმასა და 0.5 თერთმეტმეტრიანს ნიშნავს, ფეხბურთელებს კი 4 ყვითელ და 0.2 წითელ ბარათს უჩვენებს.

“ბარსელონას” მარცინიაკის მიერ განსჯილი 4 თამაშიდან კარგი მოგონებები ნამდვილად არ აქვს, თუმცა ეს კატალონიელებმა მხოლოდ საკუთარ თავს უნდა დააბრალონ. 2017 წელს ჩემპიონთა ლიგის 1/8-ფინალში “ბარსა” “პარი სენ-ჟერმენთან” სტუმრად 0-4 განადგურდა. იმავე ტურნირის მომდევნო ეტაპზე კატალონიელები უკვე “იუვენტუსთან” დამარცხდნენ, 0-3. შემდეგ იყო “ინტერთან” სტუმრად ფრე 1-1 და “ლიონის” ანგარიშით 5-1 განადგურება.

ამ 4 მატჩში მარცინიაკს წითელი ბარათი არ უჩვენებია, თერთმეტმეტრიანი კი ერთხელ დანიშნა – “ბარსა”-“ლიონის” მატჩში, მასპინძელთა სასარგებლოდ.

“ინტერს” მარცინიაკის მიერ განსჯილ შეხვედრებში, “ბარსასთან” ხსენებული ფრის გარდა, 2 მოგება და 2 ფრე აქვს. წითელი ბარათი პოლონელს არც მილანელთა დაპირისპირებებში უჩვენებია და პენალტიც მხოლოდ ერთი დანიშნა, “ინტერის” კარში.

რაც შეეხება კიდევ ერთ მნიშვნელოვან თემას, ვიდეორეფერის – ამ პოზიციაზე ასევე პოლონელი ტომაშ კვიატკოვსკია დანიშნული. მას არც “ბარსელონას” და არც “ინტერის” მატჩში არ უმსაჯია.