ბარსელონას კუნდეს შეძენას რაფინიას მსგავსად აპირებს

ცოტა ხნის წინ ცნობილი გახდა, რომ “ბარსამ” “ლიდსთან” რაფინიას თაობაზე შეთანხმებას მიაღწია – ბრაზილიელი, თითქმის, “ბარსელონას” ფეხბურთელია.

ესპანელი ჟურნალისტის, ჟერარ რომეროს (რომელმაც რაფინიაზე პირველმა გვამცნო) ინფორმაციით, კატალონიურ გრანდს სურს, ჟიულ კუნდესთან დაკავშირებით “სევილიასთან” შეთანხმებასაც ამ გზით მიაღწიოს და თანხა ნაწილ-ნაწილ გადაიხადოს (“ბლაუგრანა” რაფინიას სატრანსფერო ღირებულებას სამ ნაწილად დაფარავს).

“ლურჯ-ბროწეულისფერები” სევილიელებს ჟიულის სანაცვლოდ, დაახლოებით, 45 მილიონ ევროს სთავაზობენ და მათგან გარკვეულ დასტურს ელოდებიან, რის შემდეგაც მოლაპარაკებები გაგრძელდება. 

ცნობილია, რომ ცენტრალურ მცველებს შორის, ფრანგი ჩავი ერნანდესის ფავორიტია – რა თქმა უნდა, ანდალუსიური კლუბი მას მარტივად არ ელევა, მაგრამ, აღსანიშნავია ისიც, რომ კუნდეს “ბარსელონაში” გადმოსვლა სურს, რამაც, შესაძლოა, გადამწყვეტი როლი ითამაშოს (როგორც რაფინიას შემთხვევაში ითამაშა).

გარდა ამისა, ამავე ჟურნალისტის თანახმად, ჩავი ახალ სეზონს უკვე გეგმავს და მასში რობერტ ლევანდოვსკისაც ითვალისწინებს.