საინტერესო ფაქტები გუშინდელი ელ კლასიკოდან

“ბარსელონას” ოფიციალური საიტი გუშინდელი “ელ კლასიკოდან” საინტერესო ფაქტებს გვთავაზობს.

ჩავის ბრწყინვალე დებიუტი

ალბათ, ყველა ფიქრობს, რომ ლა ლიგის ეგიდით გამართულ სადებიუტო “ელ კლასიკოში” “ბარსას” მწვრთნელისთვის გუშინდელი 4-0 ყველაზე დიდი ანგარიშით მოგებაა. სინამდვილეში, ეს რეკორდი ფერდინანდ დაუჩიკს ეკუთვნის, რომელმაც 1951 წელს, “ლეს კორტესზე” “რეალი” 7-2 დაამარცხა. ამასთან, მადრიდელებთან ახალი თავკაცის პირველ დაპირისპირებაში 4-0 ელენიო ერერას ხელმძღვანელობითაც მოგვიგია.

თუმცა, ჩავიმ რეკორდი მაინც დაამყარა – გუშინდელი 4-0 ყველაზე დიდი ანგარიშით გამარჯვებაა “ბარსას” მწვრთნელისთვის, რომელმაც სადებიუტო “კლასიკო” სტუმრად გამართა.

ობამეიანგი გოლების გატანას არ წყვეტს

ობამეიანგი საოცარ ფორმაშია! გაბონელმა ლურჯ-ბროწეულისფერი მაისურით ჩატარებულ პირველ 11 მატჩში 9 გოლი გაიტანა. მან “რეალის” კარში 5-ჯერ დაარტყა და დუბლი შეასრულა.

ერიკ გარსიას სოლიდური თამაში

გარსია გუნდს 4 ჩაჭრილი პასით და ზუსტად შესრულებული 79 გადაცემით დაეხმარა. გუშინდელი პერფორმანსი მისთვის “ბარსას” მაისურით ერთ-ერთი საუკეთესო იყო. ერთ-ერთი მიზეზი, რატომაც გუნდმა კარი მშრალად შეინახა, სწორედ ერიკია.

შექმნილი შანსები

რა თქმა უნდა, “ბლაუგრანამ” შექმნილი შანსები გამოიყენა. განხორციელებული 10 ზუსტი დარტყმიდან, ტიბო კურტუას კარის ბადე ოთხმა შეარხია. ბელგიელმა მეკარემ 6 სეივი მიითვალა, ზოგიერთი მათგანი კი საკმაოდ რთული ასაღები იყო. ჩავის შეგირდებს ბევრად მეტის გატანაც შეეძლოთ.

უნივერსალური არაუხო

მარჯვენა მცველად მოთამაშე რონალდ არაუხომ ბრწყინვალე სამუშაო გასწია და ვინისიუს ჟუნიორი გააწამა. ურუგვაელმა ბურთი 6-ჯერ მოიპოვა და კიდევ ერთხელ დაამტკიცა, სტანდარტულების დროს შეტევაში როგორი პროდუქტიულია. ანგარიში 2-0 რონალდმა თავური დარტყმით გახადა.

13 გოლი თავით

არაუხოს გარდა, “რეალს” თავით ობამეიანგმაც გაუტანა. ჯამში, მიმდინარე სეზონში “ბარსას” ანაგრიშზე 13 თავური გოლია, რითაც კატალონიელები “ბეტისს”, “ვალენსიას”, “ბილბაოს”, “ატლეტიკოსა” და “ოსასუნას” 5 ბურთით უსწრებენ – ჩამოთვლილ გუნდებს 9-9 თავური გოლი უგროვდებათ. ამ სტილში ყველაზე მეტი (4) გოლი ლუკ დე იონგმა მიითვალა. 

დემბელე – ასისტების მეფე

გუშინ ფრანგმა კიდევ 2 ასისტი გააკეთა და ლა ლიგის მიმდინარე გათამაშებაში ჯამში 9 საგოლე გადაცემა დაუგროვდა. მისი სისწრაფე და ზუსტი პასები “რეალის” დაცვას დიდ პრიბლემებს უქმნიდა. ამასთან, უსმანი ამ საუკუნეში “ბარსას” მეორე ფეხბურთელი გახდა, რომელმაც “ელ კლასიკოში” აქტივში 2 ასისტი ჩაიწერა. ვინაა პირველი? რა თქმა უნდა, ჩავი ერნანდესი, 2009 წელს “ბერნაბეუზე” “რეალთან” 6-2 მოგებულ მატჩში – ლეგენდარულ შეხვედრაში კატალონიელთა ამჟამინდელმა მწვრთნელმა მაშინ 4 ასისტი გააკეთა. 

ქულები: 26/30

“ბარსამ” 2022 წელს შესაძლო 30 ქულიდან 26 მოიპოვა და სამთვენახევარია, არ წაუგია. ამ დროის განმავლობაში მათ “მალიორკა”, “ალავესი”, “ატლეტიკო”, “ვალენსია”, “ბილბაო”, “ელჩე”, “ოსასუნა” და “რეალი” დაამარცხეს, “გრანადასთან” და “ესპანიოლთან” კი ფრედ ითამაშეს.

2022 წელს “ბარსელონამ” “ატლეტიკოზე” 4-ით მეტი ქულა დააგროვა, “ვილიარეალსა” და “რეალზე” კი – 6-ით.

მეორე გუნდი, რომელსაც წელს არ წაუგია, “სევილიაა”.