10 რამ, რაც პიერ-ემერიკ ობამეიანგის შესახებ უნდა ვიცოდეთ

“ბარსელონას” ოფიციალური საიტი კლუბის ახალი ფეხბურთელის, პიერ-ემერიკ ობამეიანგის შესახებ საინტერესო ფაქტებს გვთავაზობს:

1. ობამეიანგი 1989 წლის 18 ივნისს, საფრანგეთის ქალაქ ლავალში დაიბადა, რომლის მოსახლეობაც 50 000 ადამიანს შეადგენს. ამავე ქალაქშია დაბადებული მისი ყოფილი თანაგუნდელი, ფრენსის კოკლენი;
2. ობამეიანგს 3 ეროვნება აქვს: ის საფრანგეთში დაიბადა, მამის მხრიდან გაბონელია, დედის მხრიდან კი – ესპანელი. საბოლოოდ, მან გაბონის ნაკრებში თამაში არჩია;
3. ობამეიანგი “ბარსას” ერთადერთი ფეხბურთელია, რომელსაც ევროპის ტოპ 5 ლიგიდან, ყველაში უთამაშია. მან კარიერა “მილანში” დაიწყო, შემდეგ “ლილში”, “მონაკოსა” და “სენტ-ეტიენში” ასპარეზობდა, რის შემდეგაც “დორტმუნდში” გადავიდა, გერმანული კლუბიდან კი თავი “არსენალში” ამოყო და საბოლოოდ, “ბლაუგრანაში” გადმოვიდა. შესაბამისად, მას იტალიის სერია ა-ში, საფრანგეთის ლიგა 1-ში, გერმანიის ბუნდესლიგასა და ინგლისის პრემიერ ლიგაში უთამაშია, მალე კი ესპანეთის ლა ლიგაშიც ითამაშებს;
4. ობამეიანგს პრიმერა დივიზიონში თამაშის სურვილი არაერთხელ გამოუთქვამს. მისი დედა, მარგარიტა ელ ბარაკოშია დაბადებული, რომელიც მადრიდთან ახლოს მდებარეობს. ბავშვობაში ის საცხოვრებლად საფრანგეთში გადავიდა;
5. ობამეიანგმა სოციალური ქსელის მეშვეობით გვამცნო, რომ მან ესპანური ენა თავისი ესპანელი ბებიისგან ისწავლა, რომელიც 2018 წელს გარდაიცვალა;
6. პიერ-ემერიკი ოჯახში ერთადერთი ფეხბურთელი არაა – მისი მამა, პიერ ობამეიანგი მრავალი წლის განმავლობაში საფრანგეთის ჩემპიონატში ასპარეზობდა, გაბონის ნაკრების მაისურით კი 80 მატჩი აქვს ჩატარებული. ამასთან, პიერ-ემერიკის ორივე ძმა პროფესიონალი ფეხბურთელია;
7. ობამეიანგი მარველის კომიქსებისა და ბეტმენის დიდი გულშემატკივარია. წლების წინ ეს ყველაფერი თავის ვარცხნილობაში აისახა, მანქანა მი ბეტმენის სტიკერებით დაამშვენა. ყველაფერთან ერთად, ის გოლებს სუპერგმირის ნიღბით აღნიშნავდა;
8. წლების განმავლობაში ობამეიანგის აღნიშვნები დიდ ინტერესს იწვევდა. დორტმუნდის “ბორუსიაში” ასპარეზობის დროს ის მარკო როისთან ერთად ბეტმენს, რობინსა და სპაიდერმენს განასახიერებდა. ასევე, გამოსარჩევია გოლების აკრობატული ნახტომით აღნიშვნაც;
9. გასულ დეკადაში ობამეიანგის გოლების რაოდენობა მუდამ ორნიშნა რიცხვს აღწევდა. ამ მხრივ მისთვის საუკეთესო 2016-17 წლების სეზონი გამოდგა, როდესაც 31 გოლით პიერ-ემერიკი ბუნდესლიგის ბომბარდირი გახდა, “ოქროს ბუცისთვის” ბრძოლაში კი მხოლოდ ლეო მესის (იმ სეზონში არგენტინელმა 37 გოლი გაიტანა) ჩამორჩა;
10. ობამეიანგს კარიერის განმავლობაში ბევრი ცნობილი მწვრთნელი ჰყავდა: “დორტმუნდში” მან იურგენ კლოპისა და ტომას ტუხელის ხელმძღვანელობით ითამაშა, “არსენალში” კი არსენ ვენგერი, უნაი ემერი და “ბარსას” ყოფილი მოთამაშე მიკელ არტეტა წვრთნიდნენ.