ჩავიმ დემბელეს გამო განაცხადის დასახელება გადადო – ბარსა ფრანგის პასუხის მოლოდინშია

AS-ის ჟურნალისტის, ხავი მიგელის ინფორმაციით, “ბარსელონას” მთავარ მწვრთნელს, ჩავი ერნანდესს ბილბაოს “ატლეტიკთან” მატჩისთვის განაცხადი დღეს უნდა დაესახელებინა, თუმცა უსმან დემბელეს გარშემო არსებული სიტუაციის გამო, ის ერთი დღით გადადო.

წყაროს ცნობით, 41 წლის სპეციალისტს სჯერა, რომ ფრანგი კონტრაქტს გაახანგრძლივებს. ამასთან, საქმე დიდხანს აღარ გაიწელება. ჩავი საღამოს მატეუ ალემანის შეხვდება და გადაწყვეტილებას დემბელეს პასუხის გათვალისწინებით მიიღებს. 

ხავი მიგელის მტკიცებით, თუ 24 წლის შემტევი კონტრაქტს ხელს მოაწერს, ის განაცხადში მოხვდება და ანსუ ფატისა და ფერან ტორესთან ერთად შეტევის ხაზს ჩამოაყალიბებს. ხოლო უარის შემთხვევაში, “ბარსა” დაუყოვნებლივ დემბელეს გაშვებაზე მუშაობას დაიწყებს, რისთვისაც სხვადასხვა სცენარი განიხილება, მაგალითად, ტრანსფერი, თავისუფლების წერილის გაგზავნა ან კონტრაქტის გაწყვეტა. უსმანის დასჯა ბასკებთან მატჩში განაცხადს მიღმა დატოვებით დაიწყება.

იგივე წყარო დასძენს, რომ ივნისამდე დემბელეს ტრიბუნებზე დასმა არ განიხილება.

განახლება: Mundo Derportivo-ს ჟურნალისტის, ედუ პოლოს ინფორმაციით, დემბელე 6 თვით ტრიბუნებზე ყოფნას არ დათანხმდება. ერთადერთი შესაძლო ვარიანტი სეზონის ბოლომდე მისი იჯარით, გამოსყიდვის უფლების გარეშე, გაშვებაა, რის შემდეგაც ფრანგს “ბარსასთან” კონტრაქტი ამოეწურება და ახალ გუნდს მოძებნის. კატალონიელები მსგავსად არდა თურანის შემთხვევაში მოიქცნენ.

ჟურნალისტის თქმით, ეს რთული, მაგრამ, არსებული სიტუაციიდან გამომდინარე, ორივე მხარისთვის მისაღები გამოსავალია.