ბრეითუეიტი თებერვლამდე ვერ დაბრუნდება

უკვე თითქმის ერთი კვირაა, რაც მარტინ ბრეითუეიტმა გუნდთან ერთად ვარჯიში განაახლა, მაგრამ მისი მოედანზე დაბრუნება იანვარში მოსალოდნელი მაინც არ არის. ინფორმაციას ჟურნალისტი ხავი მიგელი ავრცელებს. 

გადაწყვეტილია, რომ დანიელი ფორვარდი “ბარსელონას” ბილბაოს “ატლეტიკთან” კოპა დელ რეის მატჩში ვერ დაეხმარება და დიდი ალბათობით, ვერც 3 დღის შემდეგ “ალავესისთვის” მომზადებას მოასწრებს. 

გამოჯანმრთელების პროცესი თებერვლის დასაწყისში უნდა დასრულდეს. მომდევნო თვის პირველ მატჩს “ბარსა” 6 თებერვალს, “ატლეტიკოს” წინააღმდეგ გამართავს, რომელიც ჩავი ერნანდესის გუნდის უშუალო კონკურენტია და სატურნირო ცხრილში წინ მხოლოდ ერთი ქულითაა.

საკმაოდ კარგ ფორმაში მყოფი ბრეითუეიტი “ბარსელონას” სექტემბრის დასაწყისში გამოაკლდა. ამ სეზონში მარტინმა მონაწილეობის მიღება ლა ლიგის 3 თამაშში მოასწრო, პირველ ტურში კი 2 გოლის გატანა და 1 საგოლე გადაცემის შესრულება შეძლო – “ბარსას” მეტოქე “კამპ ნოუზე” “რეალ სოსიედადი” იყო. 

მარტინის არყოფნაში ცენტრფორვარდის როლს ძირითადად მემფის დეპაი და ლუკ დე იონგი ითავსებენ.