როგორ გაჩარხა ბარსამ ფერან ტორესის ტრანსფერი

ფერან ტორესის “ბარსელონაში” გადმოსვლის შესახებ ინფორმაცია დაახლოებით ერთი თვის განმავლობაში ვრცელდებოდა, გუშინ კი ეს ინფორმაცია ოფიციალურად დადასტურდა. თუმცა სინამდვილეში ტრანსფერზე მუშაობა უფრო ადრე დაიწყო.

ოქტომბრის ბოლოს, როდესაც რონალდ კუმანი “ბარსელონას” მთავარი მწვრთნელის პოსტიდან უკვე გათავისუფლებული იყო, ხოლო ჩავი ერნანდესს “ბლაუგრანაში” მუშაობა ჯერ არ ჰქონდა დაწყებული, მომავალმა მწვრთნელმა კლუბის ხელმძღვანელობასთან სატრანსფერო სამიზნეები განიხილა. ჩავიმ განაცხადა, რომ მას ჭირდებოდა ფლანგის შემტევი, რომელსაც გოლების გატანაც შეეძლო. განიხილეს ორი ვარიანტი – დანი ოლმო და ფერან ტორესი, არჩევანი კი მეორეზე შეჩერდა.

სანამ “ბარსა” “მანჩესტერ სიტის” მიმართავდა, ჩავისა და ფერან ტორესის შეხვედრა გაიმართა და ერთმანეთით ორივე მხარე მოხიბლული დარჩა. შემდეგ ტორესი უკვე ჟოან ლაპორტას ესაუბრა და ეს შეხვედრაც იგივე შედეგით დასრულდა. ამის შემდეგ ფერან ტორესმა პეპ გვარდიოლას განუცხადა, რომ მას “ბარსელონაში” წასვლა სურდა და მიიღო პირობა, რომ ტრანსფერში ხელშეწყობა ექნებოდა. ამ დრომდე ჟურნალისტებმა მიმდინარე მოვლენების შესახებ არაფერი იცოდნენ.

ამის შემდეგ, 26 ნოემბერს, მატეუ ალემანი და ფერან რევერტერი ინგლისში ჩადიან და “სიტის” აღმასრულებელ დირექტორს, ფერან სორიანოს ხვდებიან. სორიანი “ბარსასთვის” უცხო ადამიანი არაა – ის ლაპორტას კაცია, რომელსაც 2003-2010 წლების “ბარსელონას” შექმნაში ძალიან დიდი წვლილი მიუძღვის. მედიაში ვრცელდება ინფორმაცია, რომ ალემანი და რევერტერი მანჩესტერში რაჰიმ სტერლინგისთვის ჩადიან, მოულოდნელად კი გაიჟღერა ცნობამ, რომ ფერან ტორესის სახელიც ახსენეს. მალევე სტერლინგი პრესიდან გაქრა და მხოლოდ ტორესი დარჩა.

“ბარსელონა” ინგლისში კონკრეტული შეთავაზებით ჩავიდა. კატალონიელებმა უკვე იცოდნენ, როგორ უნდა ემოქმედათ. მათ იცოდნენ, რომ “სიტისთვის” ფეხბურთელის იჯარა არ უნდა შეეთავაზებინათ, რომ შეთავაზება სრულფასოვანი ტრანსფერი უნდა ყოფილიყო. მათ ზურგს ფეხბურთელის სურვილი და გვარდიოლას დაპირება უმაგრებდა. მოლაპარაკებები 40 მილიონი ევროდან დაიწყო და საბოლოოდ 55 მილიონით დასრულდა.

ასე გაჩარხა “ბარსამ” ერთ-ერთი ყველაზე იმედისმომცემი ესპანელი ფეხბურთელის ტრანსფერი.