გარემოცვა მარტინესის ბარსაში გადასვლის შანსს ადასტურებს – ბელგია ტიერი ანრის კანდიდატურას განიხილავს

როგორც ჩანს, “ბარსელონას” რონალდ კუმანის დაკავებული თანამდებობიდან გათავისუფლება გადაწყვეტილი აქვს.

გავრცელებული ცნობით, კლუბის პრეზიდენტს, ჟოან ლაპორტას ნიდერლანდელი სპეციალისტის შემცვლელად, ყველაზე მეტად რობერტ მარტინესის მოყვანა სურს.

ჟურნალისტ გილემ ბალაგეს ინფორმაციით, ესპანელი მწვრთნელის გარემოცვა ადასტურებს, რომ, თუ ახლა ამისთვის შესაფერისი დროა, მარტინესი “ბარსას” ჩაბარებაზე უარს არ იტყვის.

წყაროს თანახმად, ბელგიის ნაკრები რობერტის შემცვლელად მის ასისტენტ ტიერი ანრის მოიაზრებს, თუმცა, რა თქმა უნდა, არსებობს შანსი, რომ ლეგენდარული ფრანგი მარტინესს კატალონიურ გრანდში წამოჰყვეს.

ბალაგეს მტკიცებით, ბელგიელთა თავკაცს ამჟამინდელი პოსტის დატოვება ერთა ლიგის გამართვამდე არ სურს, მაგრამ, ამის შემდეგ, ის საკუთარ მომავალზე იფიქრებს.

ამასთან, ბელგიის ფეხბურთის ფედერაცია იმედოვნებს, რომ რობერტს ყატარში გასამართ მსოფლიო ჩემპიონატამდე დაიტოვებს, ვინაიდან, მას გუნდის განვითარებაში მნიშვნელოვანი წვლილი მიუძღვის.

ასევე, ცნობილია, რომ მარტინესს, კონტრაქტში არსებული პუნქტი ხელშეკრულების ცალმხრივად გაწყვეტის საშუალებას აძლევს და აღსანიშნავია ისიც, რომ თუ ესპანელით რომელიმე გრანდი დაინტერესდება, ფედერაცია მას არ შეაკავებს.