“ბარსელონა” ტრინკაუს ადვილად არ თმობს

კატალონიური Sport “ბარსელონას” პორტუგალიელი შემტევის, ფრანსიშკუ ტრინკაუს შესახებ ინფორმაციას ავრცელებს. ახალგაზრდა ფეხბურთელმა, რომელიც “ბარსამ” “ბრაგადან” “ახალი კრიშტიანუ რონალდუს” სტატუსით შეიძინა, ესპანეთში ჩატარებულ პირველ სეზონში თავის გამოჩენა ვერ შეძლო. 

როგორც ბარსელონური გამოცემა წერს, კლუბს ტრინკაუს იმედი ჯერ არ დაუკარგავს და მიუხედავად იმისა, რომ არაერთი შემოთავაზება აქვს, მის ადვილად დათმობას არ აპირებს. 

“ბარსასთვის” იდეალური ვარიანტი იჯარაა, რაც 21 წლის თავდამსხმელს სათამაშო დროის მიღებაში დაეხმარება, ტრანსფერზე კი კლუბი თანახმა მხოლოდ იმ შემთხვევაში იქნება, თუ სანაცვლოდ სულ მცირე 30 მილიონ ევროს მიიღებს. 

დაინტერესებულთა შორის პრემიერ ლიგის კლუბები არიან, თუმცა წყარო კონკრეტულ გუნდს არ ასახელებს. 

ტრინკაუს “ბარსელონას” შემადგენლობაში ჩატარებულ 42 მატჩში 3 გოლი აქვს გატანილი. წინა სეზონის დასაწყისში “ბლაუგრანას” მისი 40 მილიონად გაყიდვა შეეძლო, თუმცა ხელმძღვანელებმა პერსპექტიული მოთამაშის ტრანსფერზე უარი თქვეს.