“პარი სენ-ჟერმენთან” მატჩს ბიორნ კუიპერსი განსჯის

“ბარსელონასა” და “პარი სენ-ჟერმენს” შორის ზეგ გასამართ მატჩს ნიდერლანდელ მსაჯთა ბრიგადა გაუძღვება ბიორნ კუიპერსის ხელმძღვანელობით. კუიპერსის ასისტენტები – სანდერ ვან რუკელი და ერვინ ზეინსტრა იქნებიან. 

ვიდეორეფერის ოთახიდან კუიპერსს პოლ ვან ბუკელი და მისი ასისტენტი, დენის ჰიგლერი დაეხმარებიან, მეოთხე არბიტრი – სერდარ გოზუბუიუქი იქნება. “ბარსელონა” – “პარი სენ-ჟერმენის” პირველი დაპირისპირება ზეგ, “კამპ ნოუზე” გაიმართება.

ბიორნ კუიპერსი და “ბარსელონა”

“ბარსელონამ” კუიპერსის მსაჯობით 10 თამაში ჩაატარა, საიდანაც 5 მოიგო, 4 ფრედ დაასრულა და 1 წააგო. ამ 10 თამაშში, კუიპერსმა “ბარსელონას” სასარგებლოდ 2 თერთმეტმეტრიანი დანიშნა, მეტოქეს კი 2 ფეხბურთელი გაუძევა.

პირველი შეხვედრა 2009 წელს, ჩემპიონთა ლიგის ჯგუფურ ეტაპზე გაიმართა, როდესაც “ბარსამ” კიევის “დინამო”, “კამპ ნოუზე”, 2:0 დაამარცხა.

2010 წელს, ლიგის 1/8-ფინალის პირველ მატჩში, კატალონიელები “შტუტგარტს” ეწვივნენ და 1-1 ითამაშეს.

2011 წელს, ევროპის სუპერ თასზე, “ბლაუგრანამ” “პორტუს” სძლია, ანგარიშით 2-0.

2012 წელს, ჩემპიონთა ლიგის 1/4-ფინალის განმეორებით შეხვედრაში, “ბარსელონამ” “მილანი”, საკუთარ კედლებში, 3-1 დაამარცხა.

მომდევნო სეზონში, ჯგუფურ ეტაპზე, კატალონიელები “სელტიკთან” გლაზგოში დამარცხდნენ – 1-2.

2013 წელს, ჩემპიონთა ლიგის 1/4-ფინალის განმეორებით მატჩში, “კამპ ნოუზე”, “ბარსა” პსჟ-ს დაუზავდა, ანგარიშით 1-1.

2015 წელს, ჯგუფურ ეტაპზე, “ბარსელონამ” “რომასთან” სტუმრად 1-1 ითამაშა.

2017 წელს, 1/4-ფინალის განმეორებით მატჩში, “ბარსელონა” და “იუვენტუსი”, “კამპ ნოუზე”, უგოლოდ დაზავდნენ.

2019 წელს, ჩემპიონთა ლიგის ნახევარფინალში, “ბარსელონამ” შინ “ლივერპული” დაამარცხა 3-0.

2019 წელს, ჯგუფურ ეტაპზე, “ბარსელონამ” სტუმრად “ინტერი” დაამარცხა 2-1.