რატომ არ შეიძინა “ბარსელონამ” მბაპე, ჰოლანდი და ნეიმარი? | ბართომეუს ბორდის ყოფილი წევრის ინტერვიუ

“ბარსელონას” ბორდის ყოფილმა წევრმა (2010-20), ხავიერ ბორდასმა, მის გადადგომამდე არსებულ სატრანსფერო სიტუაციაზე და სხვა მნიშვნელოვან თემებზე ისაუბრა. 

“მაშინ, როცა უსმან დემბელეს ტრანსფერზე ვმუშაობდით, კილიან მბაპეს შეძენა 100 მილიონ ევროდ შეგვეძლო. 

მბაპეს მამას დავურეკე და მან მითხრა, რომ კილიანი “რეალში” გადასვლას არ აპირებდა, რადგან იქ კრიშტიანუ, ბენზემა და ბეილი უკვე თამაშობდნენ, “ბარსელონაში” გადმოსვლა კი შეეძლო, რადგან ნეიმარი უკვე წასული იყო და გუნდში ნაკლები კონკურენცია დახვდებოდა. “მონაკოს” პრეზიდენტსაც ერჩივნა, ფეხბურთელის ტრანსფერი პსჟ-ს ნაცვლად “ბარსელონაში” შემდგარიყო. 

დემბელეს შეძენა იმიტომ ვარჩიეთ, რომ მას გუნდურ მოთამაშედ მივიჩნევდით, მბაპეზე კი ვფიქრობდით, რომ მხოლოდ თავისთვის თამაშობდა. 

ნეიმარის დაბრუნებაზე სერიოზულად ვმუშაობდით. ფეხბურთელს ტრანსფერი სურდა და შეთანხმება კლუბთანაც მიღწეული გვქონდა, მაგრამ შემდეგ ნეიმარის მამამ დამატებით 20 მილიონი მოითხოვა, რაც ვერ გადავიხადეთ. “ბარსელონას” მოთამაშეები მზად იყვნენ, მისი დაბრუნების შემთხვევაში ნაკლები ხელფასი მიეღოთ. ტრანსფერისთვის ფულის შეგროვებისთვის თავიანთი შემოსავლის ნაწილს თმობდნენ, თავად ნეიმარიც აპირებდა იმ პრივილეგიებთან დამშვიდობებას, რაც პსჟ-ში ჰქონდა. 

მე ვიცი, რის გამო წავიდა ნეიმარი “ბარსელონადან”. უმჯობესია, ეს თავად გითხრათ. მესის ჩრდილქვეშ ყოფნა ამის მიზეზი არ ყოფილა. 

რატომ არ შევიძინეთ ჰოლანდი? ტექნიკური შტაბის წევრებმა მითხრეს, რომ ის “ბარსას” ტიპის ფორვარდი არ იყო. ფეხბურთელების მოყვანა ადვილია, მაგრამ წინასწარ არავინ იცის, როგორ ითამაშებენ ისინი ახალ გუნდში. 

ერნესტო ვალვერდეს გათავისუფლება მაშინ, როცა ლიგის ლიდერები ვიყავით, შეცდომა იყო. კიკე სეტიენის მოყვანაც შეცდომა იყო.

ბართომეუ ასეთ დასასრულს არ იმსახურებდა. ეს სირცხვილი იყო”. – ციტირებს ბორდასის სიტყვებს Mundo Deportivo.