“იუვენტუსი” ლუის სუარესით დაინტერესდა

ტურინის “იუვენტუსი” “ბარსელონას” ცენტრალური თავდამსხმელით, ლუის სუარესით დაინტერესდა, იტყობინება Marca.

წყაროს ინფორმაციით, “ბებერი ქალბატონი” გუნდის გაძლიერებას გეგმავს, რათა სერია A ზედიზედ მეათედ მოიგოს და 1995/96 სეზონის შემდეგ პირველად, ჩემპიონთა ლიგის თასის მოპოვებას შეეცადოს. 33 წლის ურუგვაელი კი ტურინელების ერთ-ერთი მთავარი სატრანსფერო სამიზნე იქნება.

გავრცელებული ცნობებით, სუარესით ასევე ამერიკული MLS-ის გუნდი, “ინტერ მაიამი” ინტერესდება, რომლის მფლობელიც ლეგენდარული დევიდ ბექჰემი გახლავთ. ამ გუნდმა, ცოტა ხნის წინ, “იუვენტუსიდან”, ბლეზ მატუიდი დაიმატა.

სუარესმა 2019/20 სეზონში, ყველა ტურნირზე, 36 მატჩი ჩაატარა, გაიტანა 21 გოლი და გააკეთა 12 შედეგიანი გადაცემა.