ხუან კარლოს უნსუე და “ბარსელონა”

როგორც უკვე იცით, ხუან კარლოს უნსუეს, რომელიც “ბარსელონაში” სხვადასხვა წლებში მოღვაწეობდა, განუკურნებელი დაავადება, ამიოტროფული ლატერალური სკლეროზი დაუდგინდა.

უნსუე “ბარსელონაში” ფეხბურთელის რანგში (მეკარე) 1988-1990 წლებში ირიცხებოდა, როგორც ანდონი სუბისარეტას რეზერვისტი. ესპანელმა “ბლაუგრანას” რიგებში ჩემპიონატში მხოლოდ 5 შეხვედრა ჩაატარა, შემდგომ კი “სევილიაში” გადავიდა, სადაც კარიერის მნიშვნელოვანი წლები ჰქონდა (1990-1997). 

მოთამაშის კარიერის დასრულების შემდეგ, 2003 წელს, უნსუე ფრანკ რაიკაარდის “ბარსელონაში” დაბრუნდა, ამჯერად ახალ ამპლუაში – მეკარეების მწვრთნელი. აღნიშნულ თანამდებობაზე იგი პეპ გვარდიოლას “ბარსელონაშიც” მუშაობდა. 

2010 წლის 17 ივნისს, უნსუე “ნუმანსიას” მთავარი მწვრთნელი ხდება, რომელიც მეორე დივიზიონში გამოდიოდა, თუმცა სულ რაღაც ერთი წლის შემდეგ, იგი კვლავ “ბარსელონაში”, კვლავ მეკარეების მწვრთნელად ბრუნდება. 

2014 წლის ივლისში, ესპანელი სპეციალისტი “ბარსელონაში” მესამედ ბრუნდება, როგორც გუნდის მთავარი მწვრთნელის, ლუის ენრიკეს თანაშემწე, “ბარსელონა” მალევე იგებს ჩემპიონთა ლიგასა და სხვა ტიტულებს.

ასევე ისტორიულ და გამორჩეულ მომენტად რჩება ჩემპიონთა ლიგის 2017 წლის მატჩი, სადაც კატალონიელები “პარი სენ-ჟერმენის” დამარცხებით (6:1) ისტორიას წერენ, “ლურჯ-ბროწეულისფერთა” გულშემატკივარს კი ამ მატჩიდან ხუან კარლოს უნსუეს ემოციები არასოდეს დაავიწყდება! 

“ამიოტროფულმა ლატერალურმა სკლეროზმა არცკი იცის, ვისთან აქვს საქმე… ერთიანები, როგორც არასდროს. წინ, მთელი ძალებით!” – ლუის ენრიკე.