ვისი გაყიდვა მოუწევს “ბარსას” უკიდურეს შემთხვევაში?

Marca-ს ინფორმაციით,”ბარსელონამ” 70 მილიონი ევროს მობილიზება მალევე უნდა შეძლოს, რათა სატრანსფერო ფანჯარას შესაბამისი ბიუჯეტით შეხვდეს. ამ თანხისათვის კლუბს რამდენიმე დაუგეგმავი გადაწყვეტილების მიღება მოუწევს, რაც ზოგიერთი ახლახანს დამატებული ფეხბურთელის გუნდიდან წასვლას გულისხმობს.

არტურო ვიდალი

ჩილელს “ბლაუგრანასთან” კონტრაქტი 2021 წელს ეწურება. კატალონიური კლუბი კი ხელშეკრულების განახლებით, ჯერჯერობით, დაინტერესებული არაა. მილანის “ინტერი” 32 წლის ფეხბურთელის მომავალ კლუბად ითვლება.

მარტინ ბრაითუეიტი

დანიელის მიმართ სიმპათიები ბევრ გულშემატკივარს გაუჩნდა. მოსვლის პირველივე დღიდან მან დაამტკიცა, რომ პროფესიონალი და უზომოდ შრომისმოყვარე ფეხბურთელია. მისი გუნდში დარჩენა იმის მანიშნებელია, რომ ანსუ ფატისთვის, ფარსიშკუ ტრინკაუსთვისა და ალექს კოლიადოსთვის სათამაშო დრო შემცირდება.

ჟუნიორ ფირპო

როგორც ჩანს, მარცხენა მცველი “ბარსელონას” ვერ შეეწყო და უმჯობესი იქნება, თუ კლუბი მას ზაფხულშივე შეელევა. მის გარდა რამდენიმე სხვა ვარიანტიც არსებობს ხუან მირანდას, სერხიო აკიემესა და ლაივინ კურზავას სახით, რომლებიც ჟორდი ალბასთვის მშვენიერი სათადარიგო შემცვლელები იქნებიან.

სერჟი რობერტო

მიუხედავად იმისა, რომ 28 წლის კატალონიელი “ბარსას” 4 კაპიტანს შორისაა, მის პოზიციაზე გუნდში, ნელსონ სემედუსა და მუსა ვაგეს სახით, ნამდვილად ანგარიშგასაწევი ფეხბურთელები არიან. 

ივან რაკიტიჩი

ხორვატი, დიდი ალბათობით, “ბარსადან” წავა. მას კონტრაქტი 2021 წელს ეწურება. 32 წლის ფეხბურთელისთვის სავარაუდო გუნდი, სადაც კარიერას გააგრძელებს, ანდალუსიური “სევილიაა”.