ფრენკი დე იონგი სადებიუტო “ელ კლასიკოს” წინ

“ბარსელონას” ნახევარმცველმა, ფრენკი დე იონგმა, “რეალთან” ხვალ გასამართ მატჩზე ისაუბრა. 

“აიაქსთან” ერთად “რეალის” წინააღმდეგ თამაში შარშან ნამდვილად განსაკუთრებული იყო, მაგრამ წელს განსხვავებული შეხვედრა იქნება. “ელ კლასიკოს” თვალს ყოველთვის ვადევნებდი. ყველაზე მეტად იმ მატჩით ვისიამოვნე, რომელიც “ბარსამ” 5-0 მოიგო. 

შეხვედრას მოუთმენლად ველი.

ერთმანეთის წინააღმდეგ მსოფლიოს ორი საუკეთესო გუნდი გამოდის. არ ვიცი, როგორ მიუდგება თამაშს ჩვენი მეტოქე, მაგრამ ჩვენ, როგორც ყოველთვის, დომინირებას და ბევრი სახიფათო მომენტის შექმნას ვეცდებით. 

მატჩი კიდევ უფრო დაძაბული იქნება იმიტომ, რომ სატურნირო ცხრილში თანაბარი ქულები გვაქვს. 

“კლასიკო” ჰოლანდიაშიც გვაქვს – “აიაქსისა” და “ფეიენოორდის” დაპირისპირების დროს სტადიონზე განსაკუთრებული ატმოსფეროა და ქვეყანაში ყველა ამაზე საუბრობს, თუმცა ეს ესპანური “კლასიკოსავით” მასშტაბური არ არის. მსგავს მატჩებში მონაწილეობის მიღება ყველა ფეხბურთელის ოცნებაა. 

ყველამ იცის, რამდენად მნიშვნელოვანია ჩვენთვის ლიონელ მესი. აღარავის უკვირს, როცა მას თამაშში სამი გოლი გააქვს. ის ყველა სხვას ბევრად აღემატება. ნებისმიერი გუნდი, რომელიც მის წინააღმდეგ თამაშობს, განსაკუთრებით ნერვიულობს და ეს გასაგებია. 

სუარესს ნამდვილად კარგი სეზონი აქვს. ის ფორმაშია და გოლების გატანასაც ახერხებს. გასულ წელს, მან “რეალთან” ჰეთ-თრიქი შეასრულა და იმედია, ახლაც იგივე მოხდება. 

“კამპ ნოუზე” ვთამაშობთ და ეს ჩვენთვის დიდი უპირატესობაა. ამ სეზონში, საშინაო მატჩებს განსაკუთრებით კარგად ვატარებთ”. – განაცხადა ჰოლანდიელმა.