მარსელო გალიარდო და კოპა ლიბერტადორესის დრამატული ფინალი [ვიდეო]

პერუში, ლიმას “ესტადიო მონუმენტალზე” კოპა ლიბერტადორესის ფინალი გაიმართა, რომელშიც ბრაზილიურ “ფლამენგოს” ტურნირის მოქმედი ჩემპიონი “რივერ პლეიტი” დაუპირისპირდა. როგორც იცით, არგენტინელებს მარსელო გალიარდო წვრთნის, რომელიც, პრესაში გავრცელებული ცნობების მიხედვით, ლიონელ მესის ფავორიტი და “ბარსელონას” მწვრთნელის პოსტზე ერნესტო ვალვერდეს შეცვლის მთავარი კანდიდატია. 

გალიარდოს გუნდი მატჩის დასაწყისშივე რაფაელ ბორეს გოლით დაწინაურდა და 89-ე წუთამდე იგებდა, შემდეგ კი მატჩის სცენარი მოულოდნელად განვითარდა: გაბრიელ ბარბოსამ ჯერ ანგარიში გაათანაბრა, სამ წუთში კი “ფლამენგო” წინ გაიყვანა. 

რა თქმა უნდა, ამის შემდეგ სიტუაცია დაიძაბა და დამატებულ წუთებზე ორივე გუნდის მხრიდან თითო ფეხბურთელი გააძევეს, მათ შორის მატჩის გმირი – ბარბოსა. 

[media=https://www.youtube.com/watch?v=VQtuoK2pIqk&t=28]

სავარაუდოდ, ეს შედეგი გალიარდოს კანდიდატურაზე გავლენას მოახდენს. მის გარდა, “ბარსელონა” რონალდ კუმანს და ერიკ ტენ ჰაგს განიხილავს.