პიტერ კრაუჩი: შვილიშვილებს მოვუყვები, რომ მესის წინააღმდეგ მითამაშია

ყოფილი ინგლისელი ფეხბურთელი პიტერ კრაუჩი ამაყია იმით, რომ მას ლიონელ მესის წინააღმდეგ უთამაშია.

2007 წელს, ჩემპიონთა ლიგის 1/2-ფინალში, “ლივერპულმა” მოქმედი ჩემპიონი “ბარსელონა” სტუმრად 2-1 დაამარცხა, შინ კი თავად წააგო 0-1, მაგრამ მომდევნო ეტაპზე მაინც გავიდა. კრაუჩი, პირველ მატჩში, მოედანზე 94-ე წუთზე შევიდა, განმეორებით შეხვედრაში კი – 89-ე წუთზე. მესის წინააღმდეგ ასე მცირე დროით თამაშის მიუხედავად, 38 წლის ინგლისელი აცხადებს, რომ მისთვის, ეს ისტორიული მომენტი იყო.

“მოვა დრო და შვილიშვილებს ვეტყვი, რომ ლეო მესისთან ერთად მოედანზე ვყოფილვარ. ეს მხოლოდ 2 და 1 წუთით მოხდა, მაგრამ ისტორიაში მაინც ჩაიწერა.

შვილიშვილებს ყოველთვის ვეტყვი, რომ მესი ისტორიაში უდიდესია. იმის აღსაწერად, რასაც მესი ჩადის, ხალხი ახალ-ახალ გზებს იგონებს, მე კი ვიტყვი, რომ ლეო ცოცხალი მონუმენტია. ეს არის ფეხბურთელი, რომელიც ყველა ადამიანმა ცხოვრებაში ერთხელ მაინც უნდა ნახოს.” – ციტირებს კრაუჩის სიტყვებს Marca.