ევრა: ჩემთვის ყველაზე რთული მეტოქე მილნერია. მესი? მასთან გამკლავება შემეძლო

“მანჩესტერ იუნაიტედის” ყოფილ მარცხენა მცველს, პატრის ევრას ჰკითხეს, თუ ვინ იყო მისთვის ყველაზე რთული მეტოქე, რაზეც მან საკმაოდ უცნაური პასუხი გასცა.

“როცა დერბის ვთამაშობდი, ჯეიმს მილნერი მტანჯავდა, რადგან მე შემტევი განაპირა მცველი ვიყავი. მესი? მასთან გამკლავება შემეძლო.” – ციტირებს პატრის ევრას სიტყვებს Sky Sports.

ლეო მესი და პატრის ევრა ერთმანეთს 5-ჯერ დაუპირისპირდნენ, აქედან 3-ჯერ ჩემპიონთა ლიგის ფინალში, 2-ჯერ კი 1/2-ფინალში. სამივე ფინალი მესიმ მოიგო, 1/2-ფინალში კი ერთხელ ევრამ იმარჯვა, ერთხელ მატჩი ფრედ დასრულდა. ამ 5 შეხვედრაში ლეოს ანგარიშზე 2 გოლი და 1 შედეგიანი გადაცემაა. “ბარსელონა” ევრას გუნდებს, საერთო ჯამში, 8-3 უგებს.

რაც შეეხება ჯეიმს მილნერს – 17 მატჩიდან მან ევრას 7 მოუგო, 5 ფრედ დაასრულა, 5 კი თავად წააგო. “ლივერპულის” ფეხბურთელის ანგარიშზე 3 გოლი და 3 საგოლე გადაცემაა.