ვალვერდეს პირადი რეკორდი “ბარსას” მწვრთნელის რანგში

“მონტილივიზე” “ბარსელონამ” “ჟირონა” 2:0 დაამარცხა და ესპანეთის ჩემპიონატში ზედიზედ მერვე გამარჯვება მოიპოვა.

“ვანდა მეტროპოლიტანოზე” “ატლეტიკოს” წინააღმდეგ ფრედ დასრულებული მატჩის შემდეგ კატალონიურმა გრანდმა “ვილიარეალს”, “ესპანიოლს”, “ლევანტეს”, “სელტას”, “ხეტაფეს”, “ეიბარს”, “ლეგანესსა” და “ჟირონას” სძლია.

აქამდე ერნესტო ვალვერდესთვის მაქსიმალური შედეგი ზედიზედ მოგებული 7 მატჩი იყო, რაც ორჯერ დააფიქსირა: გასული სეზონის დასაწყისსა (“ბეტისი”, “ალავესი”, “ეიბარი”, “ესპანიოლი”, “ხეტაფე”, “ჟირონა”, “ლას პალმასი”) და 15-21 ტურის შეხვედრებში (“ვილიარეალი”, “დეპორტივო”, “რეალი”, “ლევანტე”, “რეალ სოსიედადი”, “ბეტისი”, “ალავესი”).

მომდევნო მატჩს “ბარსელონა” 31 იანვარს, ესპანეთის სამეფო თასის ეგიდით “სევილიას” წინააღმდეგ გამართავს.