ესპანეთის სამეფო თასის 1/4 ფინალის პირველ მატჩში, ერთმანეთს “ბარსელონა” და “სოსიედადი” დაუპირისპირდნენ (1:0). 59-ე წუთზე მსაჯები სტუმარი გუნდის სასარგებლოდ ძალიან უხეშად შეცდნენ. კარლოს ველამ საჯარიმოში ჩააწოდა, კატალონიელებმა კი მეტოქეს მახე დაუგეს. ლაინსმენებმა თამაშგარე მდგომარეობა დააფიქსირეს.
ხელოვნურ თამაშგარეს მასპინძელთა რამდენიმე ფეხბურთელი წამოეგო, მაგრამ არა დავიდ სურუტუსა, რომელმაც კართან ძალიან ახლოს ბურთი მიიღო. მას თავისუფლად შეეძლო ანგარიშის გათანაბრება, მაგრამ არბიტრების გადაწყვეტილებამ “ბარსელონა” გადაარჩინა.
