“ბარსელონას” მთავარმა მწვრთნელმა, ჰანსი ფლიკმა ლა ლიგის მე-11 ტურში “ალავესთან” გასამართი მატჩის წინ პრესკონფერენცია გამართა.
ტოლედოში მომხდარი სარკინიგზო კატასტროფის შესახებ
ფლიკმა პრესკონფერენცია ტრაგედიის შედეგად დაზარალებულებისთვის სამძიმრის გამოცხადებით დაიწყო.
“მინდა, სამძიმარი გამოვუცხადო ამ ტრაგედიის შედეგად დაზარალებულ ყველა ადამიანს. ჩვენი ფიქრები იმ ოჯახებთანაა, რომლებიც ახლა ასეთ მძიმე პერიოდს გადიან. მათ ჩვენს თანადგომასა და სიყვარულს ვუგზავნით.”
რაფინიას ბრაზილიის ნაკრებში გამოძახების შესახებ
“ამ თემაზე დეკუს ვესაუბრე. რაფინია ჩვენთვის ძალიან მნიშვნელოვანი ფეხბურთელია. სანაკრებო წინა პაუზის შემდეგ ის ტრავმირებული დაბრუნდა, რაც ნამდვილად არ იყო საუკეთესო სიტუაცია.
თუმცა, საბოლოოდ, ასეთი რეალობა გვაქვს. ვერაფერს შევცვლით. ვიცი, რომ რაფინია აქ კაპიტანია, მაგრამ ის ბრაზილიელიცაა და როდესაც ნაკრები იძახებს, ყოველთვის მზადაა.
მსოფლიო ჩემპიონატის შემდეგ ახალი ვითარებაა. ყველას სურს ნაკრებში ყოფნა და მისი დახმარება. პირადად მე კმაყოფილი ვიქნები, თუ მისი სათამაშო წუთების გარკვეულწილად გაკონტროლებას შევძლებთ.
სინგაპურში გამგზავრება და უკან დაბრუნება იდეალური ნამდვილად არ არის. თუმცა, ეს ჩემზე არ არის დამოკიდებული და ვერაფერს შევცვლი.”
რა უნდა გააუმჯობესოს გუნდმა?
“როგორც ყოველთვის ვამბობ, სეზონის დასრულებამდე, როდესაც ტიტულების მოგების შესაძლებლობა გვექნება, ჯერ კიდევ გრძელი გზაა გასავლელი. არაფერი განსაკუთრებულად ცუდი არ მომხდარა.
“რეალ მადრიდთან” წავაგეთ და ეს არავის მოეწონა. თუმცა, საბოლოოდ, ამ რეალობას უნდა გავუმკლავდეთ. ამ მატჩის მოგება შესაძლებელი იყო, ძალიან კარგი საგოლე მომენტები გვქონდა.
მარცხი უნდა მივიღოთ და მისგან ვისწავლოთ.
არ გვყავს ჟიულ კუნდე, ჩავი ესპარტი, დანი ოლმო, ერიკ გარსია, ანდრეას კრისტენსენი… ბევრი მცველი გვაკლია.
ეს მარტივი არ არის. გამოსავალი უნდა ვიპოვოთ. ვცდილობდით, მაქსიმუმი გაგვეკეთებინა.
რაც შეეხება ხვალინდელ მატჩს, ყველაფერი ნათელია – ყველაზე მნიშვნელოვანი სამი ქულის მოპოვებაა.”
ლამინ იამალისა და ოქროს ბურთის შესახებ
“ჰარი კეინი ამ ჯილდოს იმსახურებდა. იცით ჩემი აზრი ლამინზე. მას აქვს ის დონე, რომელიც ამ ჯილდოს მოსაგებად არის საჭირო.
რაც ვნახე და რაც თავად მასაც და გუნდსაც ვუთხარი, არის ის, რომ კუბარსის შესახებ მისი სიტყვები შესანიშნავი იყო. პაუ ამ აღიარებას იმსახურებდა. ლამინმა ბოლო ორი წლის განმავლობაში ეს ჯილდო მოიგო. კუბარსიმ წარმოუდგენელი სეზონი ჩაატარა და მსოფლიო ჩემპიონატზეც შესანიშნავად ითამაშა.
ლამინით ძალიან ვამაყობ. ჩემი აზრით, მან ძალიან კარგი რეაქცია გამოავლინა. ვარჯიშზე სრულად კონცენტრირებული იყო.
სწორედ ასე რეაგირებენ ჩვენი აკადემიის აღზრდილები. მათი მენტალიტეტი გუნდისთვის ძალიან კარგია.
ჩვენ ამ შედეგს ვიღებთ. მიხარია, რომ ეს ყველაფერი დასრულდა და ახლა შეგვიძლია ყურადღება მნიშვნელოვან საკითხებზე გადავიტანოთ.”
ცენტრალური მცველის შესაძლო დამატების შესახებ
“ეს სატრანსფერო პერიოდშიც ვთქვი. ყოველთვის ვსაუბრობთ იმაზე, რა იქნება გუნდისთვის საუკეთესო და როგორ შეგვიძლია მისი გაძლიერება.
სწორედ ამაზე ვმუშაობთ. ვნახოთ, რა მოხდება. სატრანსფერო ფანჯრის გახსნამდე რამდენიმე კვირა რჩება.
ეს საკითხი დეკუსთან, ბოიანთან და ჩემი სამწვრთნელო შტაბის წევრებთან განვიხილეთ. ჩვენ სწორედ ასე ვმუშაობთ.
თუ შესაძლებლობა გვექნება, შესაძლოა, მცველი დავიმატოთ.”
დაცვაში თამაშის გაუმჯობესების შესახებ
“დაცვა მხოლოდ მცველების საქმე არ არის. ამ პროცესში ყველა ფეხბურთელი მონაწილეობს.
პირველ რიგში, ბურთი ასე მარტივად არ უნდა დავკარგოთ, როგორც ეს “რეალ მადრიდთან” გავაკეთეთ. ეს კარგი არ არის და არც იმ ხარისხს შეესაბამება, რომელიც ჩვეულებრივ გვაქვს.
უკვე ვთქვი, რომ შესაძლოა, საკმარისად დასვენებულები არ ვიყავით.
მეტი კონცენტრაციით უნდა ვითამაშოთ. როდესაც საკუთარ საჯარიმოში გვიწევს თავის დაცვა, მნიშვნელოვანია მეტოქე ფეხბურთელების პერსონალურად აყვანა.
ამ კომპონენტში საკმარისად კარგად ვერ ვითამაშეთ. უნდა მოვუმატოთ.
ამაზე ვარჯიშებზე ვმუშაობთ და ფეხბურთელებსაც ვესაუბრებით. ეს პრობლემა უნდა მოვაგვაროთ.”
გასული კვირისა და ალავესთან მატჩისთვის მზადების შესახებ
“კვირამ კარგად ჩაიარა. როდესაც მეორე დღეს მატჩი გაქვს, ყველა ფეხბურთელი კონცენტრირებული უნდა იყოს. სწორედ ამას ვითხოვ გუნდისგან.
ორი მარცხი განვიცადეთ, მაგრამ ვფიქრობ, გუნდი კარგად თამაშობს და საკუთარ შესაძლებლობებში დარწმუნებულია. სწორედ ამის ნახვა მსურს.
ძალიან კარგი ვარჯიში ვნახე. გუნდში კარგი დინამიკა და ატმოსფეროა.
ხვალ ეს ყველაფერი “ალავესთან” უნდა დავამტკიცოთ. მეტოქე დაცვაში კარგად თამაშობს და მისთვის გოლის გატანა ადვილი არ არის.
ჩვენი საუკეთესო ვერსია უნდა ვაჩვენოთ.”
ახლოვდება თუ არა ებრიმა ტუნკარას დებიუტი?
“ტუნკარა ტრავმიდან დაბრუნდა, თუმცა “ბარსა ატლეტიკში” უკვე ითამაშა გარკვეული წუთები.
მან წინასასეზონო მომზადება ჩვენთან გაიარა და ის, რაც მისგან ვნახე, მომეწონა.
ახლა ჩვენთანაა და ვარჯიშებზე კარგად მუშაობს.
ყველაფერი შესაძლებელია.”
როდრისა და მატჩის კონტროლის შესახებ
“ეს ჩვენთვის ჩვეულებრივი საკითხია. მატჩები უნდა ვაკონტროლოთ, ბურთს უფრო მეტად ვფლობდეთ და ნაკლებად ვკარგავდეთ. სწორედ ეს არის მთავარი.
უნდა გადაწყვიტო, როგორ ამოძრაო ბურთი და როგორ აიძულო მეტოქე გადაადგილდეს.
კარგია, როდესაც ბურთს არ კარგავ, რადგან ასეთ შემთხვევაში მის დასაბრუნებლად სირბილი არ გიწევს.
ამ კომპონენტში გაუმჯობესება გვჭირდება.
გამოსავალი ნაკლები შეცდომის დაშვებაა. სიმშვიდე უნდა შევინარჩუნოთ და უფრო მეტი კონტროლით ვითამაშოთ.”
ბრიან ფარინიასის შესახებ
“ბრიან ფარინიასი ერთ-ერთი ვარიანტია განაპირა მცველის პოზიციაზე სათამაშოდ.
ის ძალიან ჭკვიანი ფეხბურთელია. სეზონის დასაწყისიდან ჩვენთან ერთად ვარჯიშობს და შესანიშნავად მუშაობს.
დადგა მომენტი, როდესაც ის თამაშს იმსახურებს.”
ფრენკი დე იონგის შესახებ
“ჩემი გადმოსახედიდან ვისაუბრებ. ფრენკის შესაძლებლობებში სრულიად დარწმუნებული ვარ.
როდესაც ის 100%-ით მზადაა, წარმოუდგენელი ფეხბურთელია.
ძალიან მაღალი ხარისხი აქვს, კარგი დამოკიდებულება და დაცვითი მენტალიტეტი.
ის შესანიშნავი ფეხბურთელია, რომელიც ჩვენს დონეს ამაღლებს.”
დე იონგის ცენტრალურ მცველად გამოყენებისა და ბალდეს ფორმის შესახებ
“უკვე ვთქვი, რომ უნდა განვსაზღვროთ, ვინ ითამაშებს ცენტრალურ მცველად.
ამჟამად ჟერარ მარტინი და კუბარსი გვყავს. მათთვის რთული პერიოდია. მნიშვნელოვანია გამოსავლის პოვნა.
ფრენკის სხვადასხვა პოზიციაზე შეუძლია თამაში. მას ცენტრალურ მცველადაც შეუძლია მოქმედება.
რაც შეეხება ბალდეს, ამჟამად მას არ აქვს ის თავდაჯერება, რომელიც სათამაშოდ სჭირდება. აკლია რწმენა, რომ შეტევაში აქტიურად ჩაერთოს და მეტოქეს მაღლა შეუტიოს პრესინგით.
ჩვენი სათამაშო სტილისთვის განაპირა მცველები ძალიან მნიშვნელოვანია.
ბალდეს საკუთარი შესაძლებლობების რწმენა სჭირდება, რათა საუკეთესო დონეს დაუბრუნდეს.”
კლუბის მიერ ფლიკის მხარდამჭერი განცხადების გავრცელების შესახებ
“პრეზიდენტსა და დეკუს ვესაუბრე. ეს სასიამოვნოა.
კარგად მესმის არსებული სიტუაცია. ერთ კვირაში ორი მატჩი წავაგეთ, მაგრამ ჩემს გუნდში სრულიად დარწმუნებული ვარ.
არაფერი შეცვლილა. მენტალიტეტის ნაკლებობას ვერ ვხედავ.
ძალიან ბედნიერი ვარ, რომ აქ ვმუშაობ. არაფერი შეცვლილა.
პირველი 11 მატჩი მოვიგეთ, ახლა კი ორი შეხვედრა წავაგეთ და გამარჯვებებს უნდა დავუბრუნდეთ. ეს ჩვენი საქმეა.
ჩვენი სათამაშო იდეის სისწორეში სრულიად დარწმუნებული ვარ.
ამ გზით სეზონის ბოლომდე ვივლით.
ყველაზე მნიშვნელოვანია, საკუთარი სათამაშო ფილოსოფიის გვჯეროდეს.”
forum კომენტარები (0)