უჩვეულო სტარტი ლა ლიგაში: სამი მატჩი რვა დღეში

“ბარსელონა” 2026/27 წლების ლა ლიგის სეზონს ხვალ დაიწყებს. ჰანსი ფლიკის გუნდი ჩემპიონატში ერთვება მიზნით, რომ ზედიზედ მესამე ტიტული მოიპოვოს. “ბარსელონას” ფეხბურთელების დიდი ნაწილის 2026 წლის მსოფლიო ჩემპიონატზე მონაწილეობამ (მათ შორის 8 მსოფლიო ჩემპიონმა) მოქმედი ჩემპიონისთვის ტურნირის სტარტის გადადება გამოიწვია.

მჭიდრო კალენდარი და უახლოესი მატჩები

ბლაუგრანა ჩემპიონატში სადებიუტო შეხვედრას კვირას, თბილისის დროით 23:30 საათზე, “მარტინეს ვალეროს” სტადიონზე “ელჩეს” წინააღმდეგ ჩაატარებს – სტადიონზე, სადაც მათ ბოლო რვა ვიზიტიდან ყველა მოიგეს. კალენდარი შემდეგნაირად გრძელდება:

• მეორე ტური: ოთხი დღის შემდეგ, ხუთშაბათს, თბილისის დროით 23:00 საათზე, “ბარსელონა” “სპოტიფაი კამპ ნოუზე” ბილბაოს “ატლეტიკს” უმასპინძლებს.
• მესამე ტური: საწყისი სამი ტურის დასასრულებლად, ფლიკის შეგირდები კვლავ ბარსელონაში დარჩებიან და ორშაბათს, 31 აგვისტოს, თბილისის დროით 23:30 საათზე “რაიო ვალეკანოს” დაუპირისპირდებიან.

შედეგად, გუნდს რვა დღეში სამი მატჩის ჩატარება მოუწევს.

მხოლოდ ორჯერ ისტორიაში

მთელი ისტორიის განმავლობაში, “ბარსელონამ” ლა ლიგის თავისი პირველი სამი მატჩი რვა ან ნაკლებ დღეში მხოლოდ ორჯერ ითამაშა. ჩვეულებრივ, ლა ლიგა საწყის ტურებში შუა კვირის მატჩებს არ ნიშნავს, თუმცა მსგავსი სიტუაცია შეიქმნა 1985/86 და 2020/21 წლების სეზონებში:

• 1985/86 წლების სეზონი: ტერი ვენეიბლზის გაწვრთნილი გუნდი, სადაც ბერნდ შუსტერი, ალესანკო და ურუტი თამაშობდნენ, ტიტულს იცავდა. ჩემპიონატი სანტანდერში დაიწყო. განსხვავება ისაა, რომ მაშინ ყველა გუნდმა ითამაშა პირველი სამი მატჩი 7-8 დღის ინტერვალში, წელს კი ეს მხოლოდ რამდენიმე კლუბს უწევს.
• 2020/21 წლების სეზონი: მეორე პრეცედენტი კორონავირუსის პანდემიას უკავშირდება. ევროტურნირების დასკვნითი ეტაპის აგვისტოში ჩატარების გამო, რონალდ კუმანის სადებიუტო სეზონში ლა ლიგის სტარტმა 27 სექტემბრამდე გადაიწია. მაშინ გუნდმა შვიდ დღეში სამი შეხვედრა ჩაატარა: “ვილიარეალთან” (4-0), “სელტასთან” (3-0) და “სევილიასთან” (1-1). აღსანიშნავია, რომ მაშინ ყველა ეს მატჩი დახურულ კარს მიღმა გაიმართა.