კანსელუ ბარსელონაში უფასოდ გადმოდის

ჟოაუ კანსელუს “ბარსელონაში” გადმოსვლა გადაწყვეტილია, თანაც უფასოდ.

ავტორიტეტული ჟურნალისტების, ფაბრიციო რომანოსა და ფერნანდო პოლოს მიერ გავრცელებული ცნობებით, პორტუგალიელმა უნივერსალმა ბოლო საათებში “ალ ჰილალთან” კონტრაქტის გაწყვეტის შესახებ შეთანხმებას მიაღწია. ეს შეთანხმება 32 წლის ფეხბურთელს საშუალებას აძლევს, “ბარსელონას” უფასოდ შეუერთდეს, რითაც კატალონიური კლუბი დაახლოებით 10 მილიონ ევროს დაზოგავს.

“ბარსელონა” და ჟოაუ კანსელუ პირადი კონტრაქტის დეტალებზე ივნისის შემდეგ არიან შეთანხმებულნი. ეს ნიშნავს, რომ თუ დღეს გავრცელებული ინფორმაცია სიმართლეა, მაშინ კანსელუს “ბარსელონაში” მესამედ გადმოსვლას წინ ვერაფერი აღუდგება.

ჟოაუ კანსელუ აქამდე “ბარსელონას” ორჯერ შეუერთდა და ორივეჯერ იჯარით. “ბლაუგრანას” მაისურით მას 65 თამაში, 6 გოლი და 9 საგოლე გადაცემა დაუგროვდა.

ვინაიდან კანსელუს დაცვის ორივე ფლანგზე შეუძლია თამაში, მისი დამატება ჰანსი ფლიკს დაცვაში არაერთ ვარიანტს სთავაზობს.