ბარსელონამ დორტმუნდის მრავალწლიანი ტრადიცია დაარღვია

სახელი “დორტმუნდის ბორუსია” დიდი ხანია ვარსკვლავების გაყიდვით მიღებულ უზარმაზარ მოგებასთან ასოცირდება. გერმანული კლუბი ევროპაში ერთ-ერთი ყველაზე გამორჩეული მოდელი გახდა ტალანტების აღმოჩენის, განვითარებისა და შემდეგ კოლოსალურ თანხებად გაყიდვის კუთხით. უსმან დემბელედან დაწყებული, ჯუდ ბელინგემით, ჯეიდონ სანჩოთი, ერლინგ ჰოლანდითა და პიერ-ემერიკ ობამეიანგით გაგრძელებული, დორტმუნდელები მიეჩვივნენ თავიანთი ინვესტიციების გამრავლებასა და ფეხბურთელების ტრანსფერების ისტორიულ გარიგებებად ქცევას.

კარიმ ადეიემის “ბარსელონაში” ტრანსფერი კი განსხვავებული აღმოჩნდა. ესპანური გამოცემა Mundo Deportivo-ს თანახმად, გერმანულმა კლუბმა, წინა წლებთან შედარებით, გაცილებით მცირე სარგებელი მიიღო და დაარღვია ის წესი, რომელმაც სატრანსფერო ბაზარზე მისი რეპუტაცია შექმნა.

გასულ ხუთშაბათს კატალონიურმა კლუბმა 24 წლის გერმანელის, კარიმ ადეიემის ტრანსფერი ოფიციალურად დაადასტურა. “ბარსელონამ” ფიქსირებული თანხის სახით 22 მილიონი ევრო გადაიხადა, რასაც ბონუსების სახით 7 მილიონი ემატება – ჯამში გარიგების ღირებულება 29 მილიონ ევროს შეადგენს.

“დორტმუნდის ბორუსიამ” ფეხბურთელის უფასოდ დაკარგვას მისი კონტრაქტის ამოწურვამდე ერთი წლით ადრე გაყიდვა არჩია. მიუხედავად ამისა, გარიგებამ კლუბს ის მოგება არ მოუტანა, რითაც იგი ასე ცნობილია. 2022 წლის ზაფხულში “დორტმუნდის ბორუსიამ” ადეიემის სანაცვლოდ “რედ ბულ ზალცბურგს” 30 მილიონი ევრო გადაუხადა. შესაბამისად, ახლა კლუბს წმინდა მოგება საერთოდ არ მიუღია და მხოლოდ ფინანსური ზარალი შეიმცირა.

ტრანსფერები, რომლებმაც “დორტმუნდს” უზარმაზარი მოგება მოუტანა

• უსმან დემბელე: ფრანგის გაყიდვა “დორტმუნდის ბორუსიას” ისტორიაში ერთ-ერთ ყველაზე დიდ გარიგებად რჩება. 2016 წელს კლუბმა ის “რენიდან” მხოლოდ 15 მილიონ ევროდ დაიმატა, 2017 წლის ზაფხულში კი “ბარსელონას” 135 მილიონ ევროდ (ბონუსების ჩათვლით) მიჰყიდა. ამან კლუბს ერთ წელიწადში 120 მილიონი ევროს მოგება მოუტანა.
• ჯუდ ბელინგემი: 2020 წლის ზაფხულში დორტმუნდელებმა “ბირმინგემ სიტიდან” ბელინგემის დასამატებლად 30 მილიონი ევრო გადაიხადეს. სამი სეზონის შემდეგ, ინგლისელი ნახევარმცველი “რეალ მადრიდში” 127 მილიონად გადავიდა, რითაც გერმანულმა კლუბმა 97 მილიონი ევრო მოგება ნახა.
• ჯეიდონ სანჩო: მან დორტმუნდელთა ფილოსოფია საუკეთესოდ განასახიერა. კლუბმა ის “მანჩესტერ სიტიდან” დაახლოებით 10 მილიონ ევროდ შეიძინა, სულ რაღაც ორ წელიწადში კი “მანჩესტერ იუნაიტედს” რვაჯერ ძვირად მიჰყიდა.
• კრისტიან პულიშიჩი: “დორტმუნდის ბორუსიამ” ამერიკელი 16 წლის ასაკში აღმოაჩინა და 2015 წელს აკადემიაში ჩარიცხა. რამდენიმე წლის შემდეგ ის “ჩელსიში” 64 მილიონ ევროდ გადავიდა.
• პიერ-ემერიკ ობამეიანგი: 2013 წელს ის “სენტ-ეტიენიდან” 13 მილიონ ევროდ გადმოვიდა. ოთხი წლის შემდეგ თავდამსხმელი “არსენალში” 63 მილიონად გაიყიდა (50 მილიონი ევროს წმინდა მოგება).
• ერლინგ ჰოლანდი: 2019 წელს დორტმუნდელებმა ნორვეგიელი ფორვარდი “რედ ბულ ზალცბურგიდან” 22 მილიონ ევროდ დაიმატეს. 2023 წელს გამოსასყიდი პუნქტის გამო “მანჩესტერ სიტიმ” ის მხოლოდ 60 მილიონ ევროდ წაიყვანა, თუმცა გერმანულმა კლუბმა 38-მილიონიანი მოგება მაინც მიიღო.
• ჯეიმი გიტენსი: ეს ინგლისელი გარემარბი ტალანტებში ინვესტირების კიდევ ერთი ნათელი მაგალითია. კლუბი მან “მანჩესტერ სიტიდან” 2020 წელს თავისუფალი აგენტის სტატუსით შეავსო, 2025 წელს კი “ჩელსიში” 56 მილიონ ევროდ გადავიდა.
• ჰენრიხ მხითარიანი: სომეხი ფლეიმეიკერი 2013 წელს “შახტარიდან” 25 მილიონ ევროდ გადმოვიდა, სამი სეზონის შემდეგ კი “მანჩესტერ იუნაიტედს” 42 მილიონად მიჰყიდეს (17 მილიონი ევროს მოგება).
• მარიო გიოტცე: 2013 წელს მიუნხენის “ბაიერნმა” მარიო გიოტცეს კონტრაქტში არსებული გამოსასყიდი პუნქტი გაააქტიურა და 37 მილიონი ევრო გადაიხადა, რაც “დორტმუნდის ბორუსიასთვის” სრულად წმინდა მოგება აღმოჩნდა.

ამდენად, ადეიემის გარიგება აჩვენებს, რომ “დორტმუნდის ბორუსია” ამჯერად იძულებული გახდა ფეხბურთელს ისეთი პირობებით შელეოდა, რაც სატრანსფერო ბაზარზე მათ ჩვეულ ფილოსოფიას არ ასახავს. მიუხედავად იმისა, რომ მოთამაშის კონტრაქტის ამოწურვამდე ერთი წლით ადრე გაყიდვა ეკონომიკურად ლოგიკური გადაწყვეტილებაა, კლუბმა ის უზარმაზარი მოგება ვერ ნახა, რასაც მიჩვეულია. ეს ფაქტი კარიმ ადეიემის “ბარსელონაში” გადასვლას ერთ-ერთ ყველაზე თვალსაჩინო გამონაკლისად აქცევს კლუბის უახლეს ისტორიაში, რომელიც კოლოსალური მოგებით გაყიდული ფეხბურთელებით არის სავსე.