კარიმ ადეიემი ბარსელონაში ჩავიდა

24 წლის კარიმ ადეიემი უკვე ბარსელონაშია, რათა 2026/27 წლების სეზონისთვის “ბარსელონას” რიგით მეორე ახალწვეული გახდეს. ოჯახის წევრებთან და ახლობლებთან ერთად, გერმანელი თავდამსხმელი დორტმუნდიდან კერძო რეისით გაემგზავრა და 16:30 საათისთვის ბარსელონას ელ პრატის აეროპორტის კორპორატიულ ტერმინალში დაეშვა. ადეიემი აეროპორტში შეკრებილ მედიის წარმომადგენლებს მიესალმა და “ბარსელონაში” ტრანსფერის გამო დიდი სიხარული გამოხატა – გუნდში, რომელსაც ბავშვობიდან გულშემატკივრობს. ადეიემის დასახვედრად აეროპორტში 5 შავი მიკროავტობუსი იყო მობილიზებული, ადგილზე კატალონიის პოლიციის (Mossos d’Esquadra) ოფიცრებიც იმყოფებოდნენ.

ტრანსფერის დეტალები და სამედიცინო შემოწმება

ბარსელონაში ჩასვლის შემდეგ, დაგეგმილია, რომ ადეიემიმ ხუთშაბათს სამედიცინო შემოწმება გაიაროს, რის შემდეგაც “ბარსელონა” მის ტრანსფერს ოფიციალურად გამოაცხადებს. კატალონიური კლუბი დორტმუნდის “ბორუსიას” სატრანსფერო თანხის სახით 22 მილიონ ევროს გადაუხდის, რასაც ბონუსების სახით 7 მილიონი დაემატება. ამასთან, გერმანული კლუბი ფეხბურთელის მომავალი ტრანსფერიდან 30%-ს მიიღებს. დადასტურების შემდეგ, ადეიემი “ბარსელონასთან” 5-წლიან კონტრაქტს გააფორმებს, რომელიც 2031 წლამდე იქნება გათვლილი.

ფლიკთან შეხვედრა და პრეზენტაცია

ამ ფორმალობების დასრულების შემდეგ, ადეიემი შეძლებს ჰანსი ფლიკის ხელმძღვანელობით წინასასეზონო ვარჯიშებს შეუერთდეს. მწვრთნელი მას კარგად იცნობს, რადგან 2021 წელს გერმანიის ეროვნულ ნაკრებში მისი დებიუტი სწორედ ფლიკის დროს შედგა და ახლა ეცდება, რომ თავდამსხმელისგან მაქსიმუმი მიიღოს. გეგმის მიხედვით, ის თანაგუნდელებს პარასკევს დილის სესიაზე შეუერთდება.

კარიმ ადეიემის, როგორც “ბარსელონას” ახალი ფეხბურთელის ოფიციალური პრეზენტაცია მომავალ კვირამდე არ გაიმართება. პრეზიდენტი ჟოან ლაპორტა დეკუსთან ერთად შეერთებულ შტატებში იმყოფება და კვირას ორივე მათგანი მსოფლიო ჩემპიონატის ფინალს დაესწრება. ამიტომ, “ბარსელონას” მოთამაშის რანგში ოფიციალური პრეზენტაციისთვის ადეიემის პრეზიდენტისა და სპორტული დირექტორის დაბრუნებამდე მოცდა მოუწევს.