რა შემთხვევაში გადაიდება მალიორკასთან მატჩი?

“ბარსელონას” არსებულ საკადრო პრობლემებს კორონავირუსის ახალი ტალღაც დაემატა. “მალიორკასთან” მატჩისთვის ჩავის გუნდის ნახევარზე მეტი არ ეყოლება.

ამ მომენტისთვის, დანაკლისს 16 ფეხბურთელი შეადგენს: ალვესი, ლანგლე, ალბა, ბალდე, გავი, უმტიტი, დემბელე, ბრეითუეიტი, რობერტო, ფატი, მემფისი, დემირი, ტორესი, პედრი, დესტი და ბუსკეტსი. არაა გამორიცხული, მომდევნო დღეებში მათი რაოდენობა კიდევ გაიზარდოს.

ხელმისაწვდომ ფეხბურთელთა სია ასეთია: ტერ შტეგენი, ნეტუ, პენია, მინგესა, არაუხო, პიკე, გარსია, პუჩი, ფ. დე იონგი, ნიკო, კოუტინიო, ეზალზული, ჟუტგლა და ლ. დე იონგი. თანაც, ამ 14 ფეხბურთელიდან 3 მეკარეა.

ლა ლიგის წესდების მიხედვით, მატჩის გადადება იმ შემთხვევაშია შესაძლებელი, თუ რომელიმე კლუბს პირველი გუნდის მხოლოდ 5 ან ნაკლები ფეხბურთელი ჰყავს ხელმისაწვდომი. “ბარსას” 10 ჯანმრთელი ფეხბურთელი ჰყავს ისეთი, რომელიც პირველ გუნდშია რეგისტრირებული. 

ასევე, სარეზერვო გუნდის ფეხბურთელებთან დაკავშირებით მოქმედი წესის თანახმად, მოედანზე პირველი გუნდის, მინიმუმ, 7 ფეხბურთელი უნდა იყოს. რაც ნიშნავს იმას, რომ ჩამოთვლილი ათი ფეხბურთელიდან, სულ ცოტა, შვიდმა “მალიორკასთან” უნდა ითამაშოს: ტერ შტეგენი, ნეტუ, მინგესა, არაუხო, პიკე, გარსია, ფ. დე იონგი, პუჩი, კოუტინიო, ლ. დე იონგი.

აქვე უნდა აღინიშნოს ისიც, რომ პირველი გუნდის მხოლოდ 7 ფეხბურთელით თამაში სერიოზული რისკის მატარებელია. რომელიმე მათგანის გაძევების შემთხვევაში, გუნდს ავტომატურად წაგება ჩაეთვლება.