რას შესძენს ნიკო უილიამსი ბარსელონას

  პირობები შეთანხმებულია, “ბარსა” ვარიანტებს ეძებს როგორ დაარეგისტრიროს ნიკო უილიამსი, ტრანსფერს წინ აღარაფერი უდგას. ბოლო სეზონების განმავლობაში ნიკო უილიამსის პროგრესი აშკარაა, თავისი ძმა დიდი ხანია დაჩრდილა, ბევრად დიდი მასშტაბის ფეხბურთელი გამოდგა, ბრწყინავს ლა ლიგაში და ბრწყინავს ესპანეთის ნაკრებშიც. ისტორიაც დაწერა, ლამინე იამალის პასით ევროპის ჩემპიონატის ფინალში ინგლისის ნაკრებს გაუტანა. 

მისი ნიჭი და ტალანტი ეჭქვეშ არ დგას, თუმცა, “ბარსას” გასულ სეზონში ფლანგებზე ნამდვილად არ უჭირდა, პირიქით, მთავარი კოზირი სწორედ ფრთები იყო – რაფინიასა და იამალის სახით. თუმცა, ტრანსფერი დეკუსა და ლაპორტასთან ერთად ჰანსი ფლიკსაც სურს, ესე იგი, მას რაფინიასთვის სხვა როლი აქვს ნაპოვნი. უილიამსის ფასი 60 მილიონი ევროა, ამ რანგის ფეხბურთელისთვის მშვენიერი თანხაა. კლუბს, რომელსაც მილიარდიანი ვალი აქვს, ყველა მაღალბიუჯეტური ტრანსფერი რისკია, შესაბამისად, ისმის კითხვა – თუ “ბარსას” ფლანგზე არ უჭირს, თუ ეს ტრანსფერი ფინანსურადაც რთულია, მაშინ რატომ ცდილობს კლუბი ასე მედგრად უილიამსის შეძენას, რისი მიცემა შეუძლია მას კლუბისთვის? 

პირველ რიგში, “ბარსა” მიიღებს ძალიან კარგ დრიბლიორს, კიდევ ერთ სწრაფ შემტევს, რაც კიდევ უფრო სახიფათოს გახდის კონტრშეტევებს, უილიამსისა და ლამინეს დუეტი რაღაცით ანრი-ეტოო’ს მახსენებს, მიუხედავად პოზიციებში სხვაობისა, ასეთი ურთიერთგაგება ყოველთვის დიდი წარმატების მომტანია. გასულ სეზონში ლა ლიგის მასშტაბით უილიამსი მხოლოდ იამალს ჩამორჩა წარმატებული დრიბლინგების რაოდენობით, ხოლო, ევროპის მასშტაბით დოკუსთან იყოფს მეორე ადგილს. 

ლა ლიგის მაჩვენებელი 

როგორც ხედავთ რაფინია ამ კომპონენტში გვარიანად ჩამორჩება ლამინესა და უილიამსს. ის იშვიათად მიდის მცველთან ერთი-ერთზე, თუმცა, რაფინია “ბარსასთვის” შეუცვლელ ფეხბურთელად იქცა, ამიტომ, ახლა წარმოუდგენლად ჩანს მისი 11 კაცს მიღმა დატოვება. გასულ სეზონშიც და სადებიუტოშიც რაფინია რამდენიმე პოზიციაზე გვინახავს, მათ შორის მოედნის ცენტრშიც, შესაბამისად, მას მომდევნო სეზონში, უილიამსის ტრანსფერის პირობებში განსაკუთრებული როლი ერგება, ითამაშებს ყველგან სადაც ფლიკს დასჭირდება. შედარებისთის, რაფინია საგოლე მოქმედებებში ბევრად აღემატება უილიამსს. 

როგორც დაფაზე ხედავთ მთელი სეზონის განმავლობაში რაფინია ყველაზე ხშირად მოედნის ცენტრში ეხება ბურთს, არ აქვს მნიშვნელობა თამაშს ცენტრში იწყებს თუ ფალნგზე, ნებისმიერ შემთხვევაში ცენტრში უწევს შემოსვლა. უილიამსი კი კლასიკური გარემარბია, რომელიც უკიდურეს ფლანგზე იღებს ბურთს. 

SkillCorner-ზე დაყრდნობით შეგვიძლია ვთქვათ რომ რაფინია იყო ფეხბურთელი, რომელმაც ყველაზე მეტჯერ (353) მიიღო ბურთი ზონებს შორის, ეს კი ცენტრალურ ზონაში მოთამაშე ფეხბურთელებს ახასიათებთ, ასე დროულ გახსნასაც ცოდნა უნდა, რიტმისა და თამაშის გრძნობა. ისიც აღსანიშნია, რომ საწყისი სამი მატჩი რაფინიამ სწორედ 10 ნომერზე დაიწყო. 

“ლიდსში” როგორც წესი, მარჯვენა გარემარბად იყენებდნენ, რათა ცენტრში შემოსულს კარში დაერტყა, მორიგ დაფაზე ვხედავთ ყველა იმ ზონას, სადაც რაფინია მოქმედებს 2020/21 წლების სეზონიდან მოყოლებული, იცვლება პოზიცია, არ იცვლება გავლენა მოედანზე. 

რთულად სავარაუდოა, რომ უილიამსის შეძენის შემთხვევაში “ბარსას” ფორვარდის ფული დარჩეს, როგორც ჩანს, ფლიკი ლევანდოვსკისა და ფერანის იმედზე იქნება, ან, ვინ იცის, ამ პირობებში იქნებ რომელიმე ცენტრფორვარდის პოზიციაზეც ვიხილოთ – ან რაფინია, ან, უილიამსი. მხოლოდ იმ შემთხვევაში თუ ფერანი და რობერტი თამაშს ვერ შეძლებენ, პოლონელი ასაკშია და მიუხედავად იმისა, რომ ფიზიკურად ყოველთვის კარგად ემზადება, სეზონის განმავლობაში რამდენიმე მატჩს აუცილებლად გამოტოვებს. ფერანის იმედზე ყოფნა კი ვერ არის დიდად გონივრული. 

კიდევ ერთი დაფა გვაჩვენებს, რომ “ბარსა” ლა ლიგაში ყველაზე მაღალი პროცენტით უტევდა ცენტრალური ზონიდან, რაც სწორედ რაფინიას მანევრირებიდან გამომდინარეობს, ის ხომ თანაბრად უტევს ფლანგიდან და ცენტრიდან, ის ხომ არ არის კლასიკური გარემარბი?! 

ერთ შემთხვევაში იამალი ზრდის ფლანგიდან შეტევის პროცენტს, მეორე შემთხვევაში კი ბალდე, რომელიც რაფინიას სივრცეს ავსებს მარცხნივ. ბალდე ლა მასიაში გარემარბად თამაშობდა და მისთვის შეტევა უცხო არ არის, ამ ფეხბურთელის მთავარი უპირატესობა სწორედ შეტევაში აქტიური თამაშია. საინტერესო იქნება როგორ გაინაწილებენ სივრცეს უილიამსი და ბალდე. ამ შემთხვევაში დიდი მნიშვნელობა ექნება მათ შეთამაშებას. 

მომდევნო დაფაზე ხედავთ რომ ულიამსს უმეტესად ფლანგისკენ მიაქვს ბურთი. ასე რომ, ბალდეს ტრადიციული ჩარბენის ნაცვლად, ცენტრალური ზონის ეფექტურად ათვისებაც მოუწევს. 

უილიამსს ასევე აქვს ბურთის ართმევის მაღალი მაჩვენებელი, რომელიც ფლიკის პრესინგს წაადგება და კიდევ უფრო სახიფათოს გახდის მეტოქისთვის. გარდა ამისა, მისგან რაღაც ახალსაც ველით, რაღაც ისეთს, რაც აქამდე არ გვინახავს, “ბარსა” და “ბილბაო” აბსოლუტურად სხვადასხვა განზომილების კლუბები არიან, “ბარსელონაში” მსგავსი სტილის შემტევს წესით ფრთებიც უნდა შეესხას. 

ჰოდა, ვნახოთ რა ბიჭია ნიკო.