ბარსელონამ ვიგოში ლევანდოვსკის დუბლით მოიგო; შემდეგი გაჩერება – ნეაპოლი

“ბარსელონამ” ლა ლიგის 25-ე ტურში ვიგოს “სელტა” გასვლაზე 2-1 დაამარცხა.

ანგარიში პირველი ტაიმის მიწურულს ლამინ იამალის ასისტით რობერტ ლევანდოვსკიმ გახსნა, თუმცა მეორე ნახევრის სტარტზე იაგო ასპასმა წონასწორობა აღადგინა.

მიუხედავად იმისა, რომ “ბარსას” კარგი მატჩი არ ჰქონდა, 90+7′ წუთზე მაინც მოიგო – “სელტას” კარში დანიშნული პენალტი ლევანდოვსკიმ გაიტანა. პოლონელმა პირველ ჯერზე თერთმეტმეტრიანი ვერ გამოიყენა, მაგრამ VAR-ს ჩარევის შემდეგ გამოჩნდა, რომ ვიგოელთა მეკარეს, ვისენტე გუაიტას ფეხი კარის ხაზზე არ ჰქონდა. შესაბამისად, მეორე მცდელობით რობერტმა პენალტი ზუსტად შეასრულა და “ბარსელონას” მოაგებინა. 

ამჟამად, კატალონიური კლუბი 54 ქულით მესამე ადგილზეა. “ჟირონასა” (56 ქულა) და “რეალ მადრიდს” (61 ქულა) ამ ტურში ჯერ არ უთამაშიათ.

“ბარსელონას” შემდეგი მატჩი ჩემპიონთა ლიგაზე, 21 თებერვალს, სტუმრად, “ნაპოლის” წინააღმდეგ ელის. ლა ლიგაში კი გუნდი მომდევნო შეხვედრას 24 თებერვალს, “ხეტაფესთან” გამართავს.