რატომ უნდა ვიყიდოთ ამადუ ონანა

თუ ნახევარდაცვა არ გვივარგა, არაფერი გამოგვდის ხოლმე. ვიღაცები გუნდის გასამართად დაცვას აძლიერებენ, ვიღაცები შეტევას, მაგრამ ჩვენთან ყველაფრის ამოსავალი ყოველთვის ცენტრის სიძლიერე იყო.

ბევრჯერ გექნებათ გაგონილი, ნეტავ გერმანელი მწვრთნელი მოვიდეს კლუბშიო. ეჭვი არაა, რომ ამას გულშემატკივარი გუნდში დისციპლინისა და აგრესიის დასანერგად ნატრულობს, რაც უკანასკნელ პერიოდში რომ გვაკლია, ამას აღნიშვნაც კი არ სჭირდება. ჰოდა, თუ აგრესია და ენერგიულობა გვინდა, ამადუ ონანა ზუსტად შესაფერისი ვარიანტია.

ამ ბიჭს ფიზიკაც უვარგა, გამძლეობაც, სითამამეც და პასის კულტურაც მშვენიერი აქვს. მოკლედ, ცენტრში ერთი დაუღალავი კაცი დაგვემატება, რომელსაც ძალასთან ერთად გონებაც კარგად უჭრის და თვალიც. 

რამდენიმე სეზონის წინ, როდესაც გუნდმა გავი ათამაშა, ამ ბავშვში ყველაზე მეტად სითამამე მოგვწონდა, უშიშრობა და გაბედულობა მოგვწონდა, რომლისგანაც გასროლილი ნაპერწკალი მთელს გუნდს ცეცხლის გაღვივებაში ეხმარებოდა. კარგი ამბავი ისაა, რომ ონანაც ზუსტად ეგეთია, თავისი ეგოთი და სიამაყით, არც წაგება უყვარს და არც რამესთან შეგუებას ცდილობს, მებრძოლი ბიჭია, რასაც მოედანზე მუდმივად ამტკიცებს.

წავიდა ის დრო, ბუსკეტსი რომ ლერწამივით მოძრაობდა და თავისი ნელი მიხრა-მოხრით მეტოქეებს ადგილზე ყინავდა, უფრო სწორად, დრო კი არა, ბუსკეტსი წავიდა. შეხედეთ გვარდიოლას, რომელიც როდრით თამაშობს, ფიზიკურად ძლიერი საყრდენით. ახლა სხვა დროა, უფრო მეტს დარბიან, უფრო მეტი ძალა გჭირდება, ყოველ შემთხვევაში, იქამდე, სანამ კონტრაქტს ახალ ბუსკეტსს არ გავუფორმებთ. ჰოდა, ახალი ბუსკეტსის გამოჩენამდე, ეს ბიჭი ცხვირწინ გვყავს, უბრალოდ ფულის გადახდა არ უნდა დაგვენანოს. 

ამადუ ონანა გუნდს იმას მისცემს, რაც ბოლო წლებში ძალიან გვაკლია, – მრისხანებას. ეგ ბიჭი ჯერ ძალიან ახალგაზრდაა, მაგრამ ევროზე ბელგია აუცილებლად შეუწყვილებს დე ბრუინს, რის ხარჯზეც მეტ თავდაჯერებასაც მიიღებენ და მეტ სიხისტესაც. 

ნურავინ იფიქრებთ, რომ ონანა განახლებული კანტეა, – არა, ეგეთი არ არის. კანტე თავმდაბალი კაცია, ჩუმი და უპრობლემო, ონანა ამის საპირისპიროა, სადაც არის, იქ სახელს ტოვებს. აი, ზლატანი, ლუკაკუ, კოშტა, რამოსი და სხვები, ამათი ეგოს კაცია, უბრალოდ სიამაყესთან ერთად, ძლიერი ნახევარმცველიცაა. კანტე არა, მაგრამ კაზემიროს კი ჰგავს, ვარდნებიც იცის და შეტევაში მოულოდნელი ჩართვებიც, თითქოს ყოველთვის თავის ადგილზეა ხოლმე და თავისი გრძელი ფეხებით ყველაფრის დაფარვა შეუძლია.

არის სხვა ვარიანტებიც. კიმიხზე არაფერს ვიტყვი, უკონკურენტოა, თუმცა ონანა ფარული ბრილიანტია, რომლის აკაშკაშების სერიოზული პოტენციალი გვაქვს, თანაც მოქოქვა ორმხრივი იქნება, ის ჩვენთვის, ჩვენ მისთვის.