ბარსელონა ანსუ ფატიზე, ფერან ტორესსა და რაფინიაზე შემოთავაზებებს განიხილავს

“ბარსელონა” მომდევნო სეზონისთვის გეგმებს უკვე ადგენს. კლუბს ტრანსფერების განსახორციელებლად რამდენიმე ფეხბურთელის გაყიდვა მოუწევს.

Sport-ის ინფორმაციით, კატალონიური გრანდი მზადაა, ანსუ ფატის, რაფინიასა და ფერან ტორესზე შემოთავაზებები განიხილოს.

ჟოან ლაპორტამ რამდენიმე კვირის წინ უკვე განაცხადა, რომ გუნდი ისეთ მოთამაშეებს გაუშვებს, რომლებიც ჩავისთვის არცისე მნიშვნელოვანნი არიან. 

ანსუთი რამდენიმე კლუბი ინტერესდება, განსაკუთრებით, “მანჩესტერ იუნაიტედი”. 20 წლის შემტევი სასტარტო შემადგენლობაში თითქმის ვერასდროს ხვდება, რასაც მამამისის განცხადებები დაემატა. ფატის დარჩენა სურს, მაგრამ თუ “ბარსა” მიმზიდველ წინადადებას მიიღებს, კლუბი მას განიხილავს – გამორიცხული არაფერია. 

ფერანი დარწმუნებულია, რომ კატალონიაში წარმატებებს მიაღწევს და წასვლა არ სურს. კლუბში აღიარებენ, რომ ესპანელის გაყიდვა რთული იქნება, რადგან ის €55 მილიონადაა ნაყიდი და ნაკლებად სავარაუდოა, ჟოან ლაპორტას გუნდმა ამ თანხის დაბრუნება შეძლოს. ტორესს რამდენიმე მსურველი ჰყავს, მაგალითად, “ინტერი” და “ატლეტიკო”.

რაფინიას შემთხვევა განსხვავებულია. მან უსმან დემბელეს ტრავმით ისარგებლა და სასტარტო შემადგენლობაში ადგილი მოიპოვა, მაგრამ ბრწყინვალე სეზონს ნამდვილად ვერ ატარებს. პრემიერლიგური კლუბები ჯერ კიდევ მზად არიან, ბრაზილიელის სანაცვლოდ სოლიდური თანხა გადაიხადონ. ინგლისში რაფინიას ძალიან აფასებენ, და “ბარსამ” იცის, რომ მასში გადახდილი თანხის დაბრუნება შეუძლია. 

ნებისმიერ შემთხვევაში, საბოლოო გადაწყვეტილებებს ხელმძღვანელობა და სამწვრთნელო შტაბი ერთად მიიღებენ. ამჟამად ყველაფერი ჩუმად მიმდინარეობს, რადგან გუნდს ჯერ ჩემპიონობის განაღდება სურს, შემდეგ კი “ბარსელონას” დატვირთული ზაფხული ელის.