შანსი პაბლო ტორეს?

პედრი გონსალესი “ბარსელონას” ნახევარდაცვის შეუცვლელი ფიგურაა, მაგრამ თუ ერთი ფეხბურთელი უნდა დავასახელოთ, რომელსაც მისი მსგავსი თვისებები აქვს, ის პაბლო ტორეა – ხედვა, პასი, გოლები და ა.შ.

ტორეს მოსვლამ დიდი გამოხმაურება გამოიწვია, თუმცა ის პირველ გუნდში ძალიან იშვიათად თამაშობს. ჩავი პაბლოზე ყოველთვის კარგად საუბრობს და ახლა, როცა პედრის ტრავმა აქვს, ბუსკეტსი კი ბოლომდე მზად არაა, შესაძლოა, მას შანსი მიეცეს.

ტორემ “ბარსას” პირველ გუნდში სულ 6 მატჩი ჩაატარა და ჯამში მოედანზე 213 წუთი გაატარა. ძირითად შემთხვევებში ჩავი მას ჩემპიონთა ლიგაზე ათამაშებდა, რაც შესაფასებლად საკმარისი არაა – უკვე თებერვლის შუა რიცხვებია და პაბლოს დონე ჯერ კიდევ არ ვიცით.

“კადისთან” დღეს გასამართი მატჩი, “ოლდ ტრაფორდზე” ჩასატარებელ განმეორებით შეხვედრამდე, შესაძლოა, ლა ლიგაში ტორესთვის სასტარტო შემადგენლობაში სადებიუტო იყოს. მას ესპანეთის ჩემპიონატში აქამდე მხოლოდ 13 წუთი უთამაშია (“ბილბაოსთან” 4-0 მოგებულ მატჩში).

თუ ჩავი კვლავ 4 ნახევარმცველის დაყენებას გადაწყვეტს, დიდი ალბათობით, ტორე ძირითადში იქნება. იმის გათვალისწინებით, რომ გავი “მანჩესტერთან” დისკვალიფიკაციის გამო ვერ ითამაშებს, ალბათ, ისიც სასტარტოში მოხვდება, კესიემ და ფრენკი დე იონგმა კი შეიძლება დაისვენონ.

როცა ტორე მოედანზეა, მეტოქისთვის საფრთხეს ნამდვილად ქმნის. მაგალითად: მან ჩემპიონთა ლიგაზე “პლზენს” გაუტანა, ესპანეთის თასზე კი “ინტერსიტისთან” რონალდ არაუხოს ასისტი გაუკეთა.