ბარსელონა ორი ფინანსური ოპერაციის დახურვასთან ახლოსაა | MD

დღეს გაირკვა, რომ “ბარსელონას” ფინანსური მდგომარეობა იმაზე უარესია, ვიდრე გვეგონა – ლა ლიგის მიერ გამოქვეყნებული ოფიციალური მონაცემებით, კლუბს 144 მილიონი ევროს ოდენობით უარყოფითი სახელფასო ლიმიტი აქვს, რაც ტრანსფერების განხორციელებასა და ფეხბურთელების დარეგისტრირებას კიდევ უფრო ართულებს.

Mundo Deportivo-ს ინფორმაციით, “ბარსას” მდგომარეობის გამოსასწორებლად გამოსავალი მოძებნილი აქვს და ამჟამად ორი ფინანსური ოპერაციის დახურვაზე მუშაობს. 

პირველი მათგანი CVC-სთან შეთანხმებაა. სატელევიზიო უფლებების 10%-იანი წილის 50 წლით გადაცემის სანაცვლოდ მიღებული 300 მილიონი ევრო კლუბს მიმდინარე სეზონის ბიუჯეტის შესრულების საშუალებას მისცემს. პროექტის LaLiga Impulso პირობებით, კლუბებს ტრანსფერებსა და მოთამაშეთა რეგისტრაციისთვის მიღებული თანხის მხოლოდ 15%-ის გამოყენება შეუძლიათ, თუმცა “ბლაუგრანა” ამ რიცხვის 30%-მდე გაზრდაზე მუშაობს.

მეორე ოპერაცია Barca Studios წილის გაყიდვაა. ამ გზით კლუბი მნიშვნელოვან შემოსავალს მიიღებს, რაც გუნდის გაძლიერებისთვის გადამწყვეტი იქნება. “ბარსელონას” ორი შემოთავაზება აქვს – ერთ-ერთი მსურველი 49%-იანი წილის სანაცვლოდ 350 მილიონს იხდის და კატალონიელები გამოსყიდვის უფლებას ინარჩუნებენ, მეორე კი 30%-იან წილს ყიდულობს და კლუბს გამოსყიდვის უფლება არ რჩება.

განიხილება “ბარსას” ლიცენზირებისა და მერჩენდაიზინგის (BLM) აქტივის წილის გაყიდვაც, რაზეც კლუბი მუშაობს, თუმცა ჯერ სერიოზული არაფერია. ამაზე ცოტა ხნის წინ ჟოან ლაპორტამაც ისაუბრა და ხაზი გაუსვა, რომ Barca Stuidos-თან ერთად, მნიშვნელოვანია BLM-ის გამოსყიდვის უფლების შენარჩუნებაც.