ესპანეთის თასზე ბარსას ყველა პოტენციური მეტოქე ცნობილია

ესპანეთის თასის 1/16 ფინალური ეტაპი დასრულდა და 1/8 ფინალში “ბარსელონას” ყველა პოტენციური მეტოქე ცნობილია.

საუკეთესო 16 გუნდში ქვედა ლიგებიდან მხოლოდ 3 მოხვდა – “ჟირონა” და “სპორტინგი” მე-2 დივიზიონიდან და “ატლეტიკო ბალეარესი” მე-3 დივიზიონიდან. დანარჩენი გუნდები ლა ლიგიდან არიან – ატლეტიკო, ბილბაო, კადისი, ელჩე, ესპანიოლი, მალიორკა, რაიო ვალიეკანო, ბეტისი, რეალი, სოსიედადი, სევილია, ვალენსია.

წილისყრა ხვალ, 7 იანვარს, თბილისის დროით 15:30 საათზე გაიმართება. წილისყრის პრინციპი ასეთია – ჯერ მე-2 და მე-3 დივიზიონის გუნდების მეტოქეები გამოვლინდებიან. ისინი აუცილებლად ლა ლიგის გუნდებს უნდა დაუპირისპირდნენ. ქვედა დივიზიონებში მოთამაშე სამეულის მეტოქეების გარკვევის შემდეგ ლა ლიგის დარჩენილი 10 გუნდი ერთმანეთთან დაწყვილდება. 1/8 ფინალური ეტაპიც ერთმატჩიანია.