“ბარსა” დავიდ ალაბას ალტერნატივად ხოსე გაიას განიხილავს

Mundo Deportivo-ს მიერ გავრცელებული ინფორმაციის თანახმად, “ბარსელონა” “ბაიერნის” ავსტრიელი უნივერსალის, დავიდ ალაბას ტრანსფერის ჩაშლის შემთხვევაში ხოსე გაიას შეძენას შეეცდება.

“ბარსელონას” პრიორიტეტი ალაბას შეძენაა, რომელსაც დაცვასა და ნახევარდაცვაში თამაში შესანიშნავად შეუძლია. რამდენიმე დღის წინ გავრცელებული ცნობებით, “ბლაუგრანამ” 28 წლის ფეხბურთელთან სიტყვიერ შეთანხმებასაც კი მიაღწია, მაგრამ ტრანსფერის დასრულებამდე ჯერ კიდევ დიდი გზაა გასავლელი. მიუხედავად იმისა, რომ ავსტრიელი ზაფხულში თავისუფალი აგენტი ხდება, პრობლემად რჩება მისი მაღალი ანაზღაურება.

კატალონიური წყაროს ცნობით, “ბარსა” ალაბას ალტერნატივად “ვალენსიას” მარცხენა მცველს, ხოსე გაიას განიხილავს. “ბლაუგრანა” 25 წლის ესპანელის დამატებას იმ შემთხვევაში შეეცდება, თუ დავიდის ტრანსფერი ჩაიშლება. მატეუ ალემანი, რომელიც კლუბის ახალი პრეზიდენტის, ჟოან ლაპორტას გუნდს შეუერთდება, ფეხბურთელთან კარგი ურთიერთობა აქვს. ივარაუდება, რომ იგი გაიას დაყოლებას შეძლებს.

ხოსა გაიას მოქმედი კონტრაქტის ვადა 2023 წლის ივნისში იწურება. Transfermarkt-ის მიხედვით, მისი ამჟამინდელი სატრანსფერო ფასი 35 მილიონ ევროს შეადგენს.