ლეო მესი ისტორიული რეკორდის მიჯნაზე

ლეო მესის “ბარსელონას” შემადგენლობაში 766 მატჩი აქვს ჩატარებული და ჩავის ისტორიულ რეკორდს მხოლოდ 1 მატჩით ჩამორჩება.

იმ შემთხვევაში, თუ არგენტინელი ორშაბათს, “უესკასთან” შეხვედრაში ითამაშებს, ის ჩავის გაუთანაბრდება.

“ბარსას” მაისურით “ლა პულგას” 6 სხვადასხვა ტურნირზე თამაშის გამოცდილება აქვს. ლა ლიგაში მან 509 მატჩი თამაშა, ჩემპიონთა ლიგაზე – 149, კოპა დელ რეიზე – 79, ესპანეთის სუპერ თასზე – 20, მსოფლიოს საკლუბო ჩემპიონატზე – 5 და ევროპის სუპერ თასზე – 4.

766 მატჩიდან ლეოს 535 აქვს მოგებული, ფრედ 140 შეხვედრა დასრულდა, ხოლო 91-ში დამარცხდა.

ყველაზე მეტჯერ ის “რეალს” დაუპირისპირდა (44), “სევილიას” 43-ჯერ და “ატლეტიკოს” კი 42-ჯერ. 

თუ ლეო სეზონის დარჩენილ ყველა შეხვედრაში მიიღებს მონაწილეობას, მის ანგარიშზე 776 მატჩი იქნება.

კატალონიურ კარიერაში ლეოს 659 გოლი აქვს გატანილი და 289 ასისტი შესრულებული. ჩავიმ კარიერაში 27 ტიტულის მოპოვება შეძლო, მესის ანგარიშზე კი ჯერჯერობით 34 თასია.