72 დარტყმაში 9 გოლი | როგორ უმჯობესდება ლეოს სტატისტიკა?

2020/21 სეზონის დასაწყისში ლეო მესის უღიმღამო, უიღბლო და საბოლოო ჯამში უშედეგო თამაში არასაფეხბურთო მიზეზებით უფრო იყო განპირობებული, ვიდრე ფეხბურთელის კარიერული დაღმასვლით.

როგორც Sport-მა განაცხადა, ამ მომენტისათვის არგენტინელს მოედანზე პედრის სახით, კომფორტული პარტნიორი ეგულება და მასთან ნდობის ხარჯზე ფსიქოლოგიურადაც უფრო დარწმუნებული გამოდის. ლუის სუარესის “ატლეტიკოში” გადასვლის შემდეგ, მესის ასეთი მეწყვილე არ ჰყავდა და უმეტესად არასტაბილური გრიზმანისა და ბრეითუეიტის იმედზე ყოფნა უწევდა.

ამას გარდა, ლეოს გასახდელში მწვრთნელთან ურთიერთობაც დაულაგდა და კუმანთან უკვე უშუალო, დადებითი კავშირი აქვს. ასეთმა მხარდაჭერამ არგენტინელისთვის მნიშვნელოვანი შედეგიც გამოიღო და “ბილბაოსთან” დუბლი სტანდარტული მდგომარეობების გარეშე შეასრულა, პირველ გოლში კი მისი წვლილი საგრძნობლად დიდი იყო. რომ არა 90-ე წუთზე გაკეთებული არაზუსტი გადაცემა, რომელსაც “ბლაუგრანას” კარში გოლი მოჰყვა, მისი მარგი ქმედების კოეფიციენტი გაცილებით მაღალი იქნებოდა. 

ლეოს წარმატებულ თამაშსა და იღბალზე “ბარსელონასთვის” ამ სეზონშიც ბევრი რამაა დამოკიდებული, ვინაიდან, ჯამურად გუნდის მიერ კარის ჩარჩოში წასული 122 დარტყმიდან 72 სწორედ ლეო მესის ანგარიშზეა.