ხორხე მესის ოფიციალური განცხადება

ლიონელ მესის მამამ და ოფიციალურმა წარმომადგენელმა, ხორხე მესიმ, ლა ლიგის პრეზიდენტს, ხავიერ ტებასს, ოფიციალური განცხადებით მიმართა. 

“მე, ხორხე ორასიო მესი, როგორც პროფესიონალი ფეხბურთელის, ლიონელ ანდრეს მესის წარმომადგენელი, 30 აგვისტოს ეროვნული საფეხბურთო ლიგის მიერ მის კონტრაქტთან დაკავშირებით აშკარად მიკერძოებულად გამოქვეყნებულ განცხადებასთან დაკავშირებით ვაცხადებ:

არ ვიცი, რომელი კონტრაქტი გააანალიზეს მათ და რის საფუძველზე დაასკვნეს, რომ ფეხბურთელის მიერ კონტრაქტის გაწყვეტის შესახებ გადაწყვეტილების ცალმხრივად მიღების შემთხვევაში ამოქმედდებოდა გამოსასყიდი თანხის გადახდის ვალდებულება. 

თქვენი მხრიდან აშკარა შეცდომას აქვს ადგილი. შესაბამისად, როგორც მოთამაშესა და კლუბს შორის გაფორმებული კონტრაქტის 8.2.3.6 პუნქტში პირდაპირ წერია, “კომპენსაციის ვალდებულება არ იმოქმედებს მაშინ, თუ 2019/20 წლების სეზონის დასრულების შემდეგ კონტრაქტი ცალმხრივად იქნება გაწყვეტილი”. 

თუ სხვა პუნქტებს მხედველობაში არ მივიღებთ, მხოლოდ ამის გათვალისწინებითაც კი ნათელია, რომ 700-მილიონიანი კომპენსაცია, რომელიც 8.2.3.5 პუნქტშია ნახსენები, ამ სიტუაციაში არ მოქმედებს”.