დემბელე მანჩესტერში არ გაემგზავრება

კატალონიური გრანდის თავკაცმა ფრანგი ფეხბურთელის ჯანმრთელობის მდგომარეობაზე კომენტარი გააკეთა.

მოგეხსენებათ, უსმან დემბელე მარტის დასაწყისიდან მოყოლებული ტრავმირებულია. იყო ვარაუდი, რომ შეიძლებოდა, ის უეფას ჩემპიონთა ლიგის 1/4 ფინალური ეტაპის პირველი მატჩისთვის დაბრუნებულიყო, მაგრამ, როგორც ჩანს, ეს არ მოხდება.

ერნესტო ვალვერდეს თქმით, 21 წლის შემტევი “ატლეტიკოსთან” შეხვედრას გამოტოვებს და გუნდს არც მანჩესტერში გაჰყვება.

“სამწუხაროდ, უახლოეს შეხვედრებში დემბელე ჩვენს დახმარებას ვერ შეძლებს. არ გვინდა, რომ მისი ჯანმრთელობა გავრისკოთ. ის მომავალში უფრო მეტად დაგვჭირდება. ველით მის დაბრუნებას”, – განაცხადა ვალვერდემ.

შეგახსენებთ, დემბელეს ანგარიშზე მიმდინარე სეზონში, ყველა ტურნირში ერთად, 35 ჩატარებულ მატჩში 14 გოლი და 8 საგოლე გადაცემაა.