“ბარსელონას” მუნირთან კონტრაქტის გახანგრძლივება სურს

შესაძლოა, “ბარსელონას” გულშემატკივრებს მუნირ ელ ჰადადი აღარც ახსოვთ, მაგრამ “ალავესში” განათხოვრებული 22 წლის თავდამსხმელი შედეგიან თამაშს განაგრძობს და კატალონიური კლუბი მასთან კონტრაქტის გახანგრძლივებაზე ფიქრობს.

მუნირი “ალავესის” ლიდერია როგორც გატანილ გოლებში (13), ასევე საგოლე გადაცემებში (7). აღსანიშნავია ისიც, რომ როდესაც მუნირს გოლი გააქვს, “ალავესი” არ აგებს.

პრიმერას გასულ ტურში, “ლას პალმასთან” 4:0 მოგებულ შეხვედრაში, პირველი 2 გოლი სწორედ “ბარსელონას” საკუთრებაში მყოფმა ახალგაზრდა თავდამსხმელმა გაიტანა.

ფეხბურთელის კარგ ფორმაში ყოფნა “ბარსელონას” მესვეურებს არ გამორჩენიათ. კატალონიელებს სურთ, მუნირთან 2019 წლამდე მოქმედი კონტრაქტი ერთი წლით გაახანგრძლივონ. ასეთ შემთხვევაში, კლუბს ფეხბურთელის ბედის გადასაწყვეტად მეტი დრო ექნება და მისი გაყიდვის შემთხვევაში, უფრო მეტს თანხასაც მიიღებს.