მთავარ შიგთავსზე გადასვლა
ჩაერთე პროგნოზების ლიგაში და გამოიცანი მატჩების შედეგები! ითამაშე პროგნოზების ლიგა! თამაში
ბარსელონა თებერვალში ქუვეითში ამხანაგური მატჩის ჩატარებას გეგმავს

ბარსელონა თებერვალში ქუვეითში ამხანაგური მატჩის ჩატარებას გეგმავს

მოკლედ
"ბარსელონამ" ქუვეითის ფეხბურთის ასოციაციასთან თანამშრომლობის შეთანხმებას მიაღწია და 2027 წლის თებერვალში ქუვეითის ნაკრებთან ამხანაგური მატჩის ჩატარებას განიხილავს. შეხვედრა მხოლოდ იმ შემთხვევაში გაიმართება, თუ კატალონიური კლუბი ჩემპიონთა ლიგის მერვედფინალში პირდაპირ გავა.

Mundo Deportivo-ს ინფორმაციით, “ბარსელონამ” ქუვეითის ფეხბურთის ასოციაციასთან თანამშრომლობის შეთანხმებას მიაღწია, რომლის ფარგლებშიც 2027 წლის თებერვალში ამხანაგური მატჩის ჩატარება იგეგმება. კატალონიური კლუბი შესაძლოა ქუვეითის ეროვნულ ნაკრებს დაუპირისპირდეს.

“ბარსელონას” ვიცე-პრეზიდენტი რაფა იუსტე ქუვეითში იმყოფება, სადაც ქვეყნის ახალგაზრდობისა და სპორტის სახელმწიფო მინისტრს, თარიქ ალ-ჯალაჰმასა და ფეხბურთის ასოციაციის პრეზიდენტს, აჰმად ალ-იუსეფ ალ-საბაჰს შეხვდა.

ქუვეითის ფეხბურთის ასოციაციის პრეზიდენტმა დაადასტურა, რომ თანამშრომლობის ერთ-ერთი მთავარი ინიციატივა “ბარსელონასა” და ქუვეითის ნაკრებს შორის ამხანაგური შეხვედრის გამართვაა.

“შევთანხმდით ქუვეითის ეროვნულ ნაკრებსა და “ბარსელონას” შორის საერთაშორისო ან ამხანაგური მატჩის ორგანიზებაზე. ვიმედოვნებთ, რომ შეხვედრა 20-დან 28 თებერვლამდე გაიმართება და ქვეყნის ეროვნული დღისა და გათავისუფლების დღის აღნიშვნას დაემთხვევა”, – განაცხადა ალ-საბაჰმა.

მატჩის ჩატარება ჩემპიონთა ლიგაზეა დამოკიდებული

მიუხედავად მიღწეული შეთანხმებისა, ამხანაგური მატჩის ჩატარება ჯერ საბოლოოდ დადასტურებული არ არის. ყველაფერი იმაზე იქნება დამოკიდებული, როგორ შედეგს აჩვენებს “ბარსელონა” ჩემპიონთა ლიგის ლიგის ფაზაში.

თუ ჰანსი ფლიკის გუნდი გათამაშების ამ ეტაპს საუკეთესო რვა კლუბს შორის დაასრულებს, მერვედფინალის საგზურს პირდაპირ მოიპოვებს და თებერვლის ბოლოს თავისუფალი კვირა ექნება. სწორედ ამ პერიოდში იქნება შესაძლებელი ქუვეითში გამგზავრება და ამხანაგური მატჩის ჩატარება.

წინააღმდეგ შემთხვევაში “ბარსელონას” ჩემპიონთა ლიგის პლეი ოფში მონაწილეობა მოუწევს. საპასუხო შეხვედრის გამო კატალონიურ კლუბს ქუვეითში გასამგზავრებლად თავისუფალი დრო აღარ დარჩება.

თანამშრომლობა ქალთა ფეხბურთსაც მოიცავს

ქუვეითის ფეხბურთის ასოციაციასა და “ბარსელონას” შორის შეთანხმება მხოლოდ ამხანაგური მატჩის ორგანიზებით არ შემოიფარგლება.

თანამშრომლობის ფარგლებში ქუვეითის ქალთა ფეხბურთის კომიტეტის წევრებისგან დაკომპლექტებული დელეგაცია ბარსელონას ეწვევა და იქ 3-4 დღეს გაატარებს.

ვიზიტის მიზანი ქალთა სპორტის განვითარებაში “ბარსელონას” გამოცდილების გაცნობა და ამ მიმართულებით ცოდნის გაზიარებაა.

ითამაშე პროგნოზების ლიგა!

გამოიცანი ბარსელონას მატჩების შედეგები, დააგროვე ქულები და გახდი საუკეთესო პროგნოზისტი.

თამაში

კომენტარები (0)

დატოვე კომენტარი