“ბარსა ატლეტიკის” მთავარმა მწვრთნელმა ჟულიანო ბელეტიმ Mundo Deportivo-სთან ინტერვიუში საკუთარი სამწვრთნელო მიდგომების, ფსიქოანალიზისადმი ინტერესისა და ახალგაზრდა ფეხბურთელების განვითარების შესახებ ისაუბრა.
ბელეტი, რომელიც “ბარსელონას” აკადემიაში უკვე სამი წელია მუშაობს, სარეზერვო გუნდს მეორე სეზონია ხელმძღვანელობს. მისი გუნდი ჩემპიონატის ლიდერია, თუმცა ბრაზილიელისთვის დაწინაურებასთან ერთად პრიორიტეტულია ფეხბურთელების პირველი გუნდისთვის მომზადება.
რატომ სწავლობს ბელეტი ფსიქოანალიზს?
მწვრთნელის სამუშაო ოთახში დაფაა, რომელზეც ფეხბურთელების სახელებთან ერთად მათი ასაკიც წერია. ბელეტი განმარტავს, რომ ეს თითოეულ მოთამაშესთან ურთიერთობისას ინდივიდუალური მიდგომის შერჩევაში ეხმარება.
“კომუნიკაცია ძალიან მნიშვნელოვანია. ფეხბურთელების ასაკისა და ხასიათის გათვალისწინებით, ერთსა და იმავე საკითხზე ყველასთან ერთნაირად ვერ ისაუბრებ. ფსიქოანალიზი შევისწავლე. ეს მეხმარება, მნიშვნელოვან მომენტებში თითოეულ მათგანთან საუბრის სწორი გზა ვიპოვო.”
ბელეტის თქმით, ფსიქოანალიზით საკუთარი გადაწყვეტილებების უკეთ გასაგებადაც დაინტერესდა. მას სურს იცოდეს, როგორ უნდა იმოქმედოს ზეწოლის ქვეშ და როგორ გაითვალისწინოს ფეხბურთელების ქცევა და რეაქციები.
ბრაზილიელი აღნიშნავს, რომ დღევანდელ თაობასთან ურთიერთობა მნიშვნელოვნად განსხვავდება მისი ფეხბურთელობის პერიოდისგან. ამ მხრივ მას სამი შვილის გამოცდილებაც ეხმარება, რომლებიც დაახლოებით მისი ფეხბურთელების ასაკის არიან.
ახალგაზრდების მომზადება ჰანსი ფლიკისთვის
ბელეტის მთავარი მიზანი ახალგაზრდების განვითარებაა. მისი თქმით, “ბარსა ატლეტიკის” დაწინაურებისთვის ბრძოლა და ფეხბურთელების პირველ გუნდში გადასვლისთვის მომზადება ერთმანეთს არ ეწინააღმდეგება.
“თუ ფლიკს ახალგაზრდები დასჭირდება, ისინი მზად არიან. ეს ჩავი ესპარტმა და ბრიან ფარინიასმა უკვე დაამტკიცეს.”
მწვრთნელმა განსაკუთრებით გამოყო ფარინიასის მენტალიტეტი და შრომისმოყვარეობა. ბელეტის თქმით, ახალგაზრდა ნახევარმცველი მზად აღმოჩნდა როგორც საყრდენი ნახევარმცველის, ისე უფრო წინ წაწეული ცენტრალური ნახევარმცველის პოზიციაზე სათამაშოდ.
ბელეტი მუდმივად ცდილობს საკუთარი ცოდნის გაღრმავებას. ის ძველ მატჩებსა და სხვადასხვა თაობის მწვრთნელების ინტერვიუებს უყურებს, სწავლობს გამარჯვებისა და მარცხის შემდეგ მათ რეაქციებს და ამ გამოცდილებას ყოველდღიურ მუშაობაში იყენებს.
მისი სამწვრთნელო მეთოდების ნაწილია კაპიტნების მონაცვლეობა, რათა პასუხისმგებლობა მეტმა ფეხბურთელმა იგრძნოს. ასევე, გუნდი ზოგჯერ მატჩამდე იმ ტიპის საფარზე ვარჯიშობს, რომელზეც თამაში მოუწევს.
ბელეტის უკმაყოფილება ჟირონასთან მატჩის გამო
ბრაზილიელმა “ჟირონა B-სთან” მატჩის გადადებაზე უარის შესახებაც ისაუბრა. შეხვედრის წინ გუნდს ათი ფეხბურთელი სანაკრებო ვალდებულებების გამო აკლდა, დანაკლისს კი ტრავმირებულებიც ემატებოდნენ.
“გაბრაზებული კი არა, იმედგაცრუებული ვარ. 50 წლის ვარ, ბევრი რამ მინახავს, მაგრამ ასეთი არასდროს არაფერი. ამ მატჩის ჩატარება არ იყო სწორი გადაწყვეტილება.”
ბელეტის განცხადებით, საბოლოოდ მატჩის ჩატარების შესახებ ინფორმაცია დაწყებამდე მხოლოდ შვიდი საათით ადრე მიიღო, რამაც გუნდის მოსამზადებელი პროცესი მნიშვნელოვნად გაართულა.
მწვრთნელმა დადებითად შეაფასა ფიზიკური მომზადების სპეციალისტ ჟულიო ტუსის საქმიანობა და სამწვრთნელო შტაბში სერხიო ბუსკეტსის მონაწილეობაც. მისი თქმით, გუნდის წარმატებისთვის აუცილებელია, ყველა თანამშრომელი საერთო ხედვით მუშაობდეს.
ბელეტისთვის საბოლოო შედეგზე არანაკლებ მნიშვნელოვანია განვითარების პროცესი. მისი მიზანია, ახალგაზრდებმა ყოველდღიურ კონკურენციას მიეჩვიონ და პირველ გუნდში გადასვლისას მაღალი დონის ფეხბურთისთვის მზად იყვნენ.




forum კომენტარები (0)