25 ოქტომბერს, “რეალ მადრიდთან” გასამართ ელ კლასიკოზე “ბარსელონას” მაისურის ცენტრალურ ნაწილს ამერიკელი მუსიკოსისა და არტისტის, Tyler, The Creator-ის მიერ დაარსებული მოდისა და შემოქმედებითი ბრენდის, GOLF WANG-ის (GOLF) ლოგო დაამშვენებს. ამ ექსკლუზიური ფორმით პირველად ქალთა გუნდი ისარგებლებს – 24 ოქტომბერს, Liga F-ის შეხვედრაში, რის შემდეგაც კვირას ესტაფეტას ჰანსი ფლიკის გუნდი გადაიბარებს.
ეს გახლავთ პირველი შემთხვევა, როდესაც Spotify-მ არტისტსა და მის ბრენდს სრული შემოქმედებითი თავისუფლება მიანიჭა როგორც აუდიოვიზუალური, ისე გრაფიკული კამპანიის მართვაში. Tyler, The Creator ცნობილია ჰიპ-ჰოპის, R&B-ის, სოულის, პანკისა და ექსპერიმენტული ელემენტების უნიკალური სინთეზით. წლების განმავლობაში მისი მუსიკა კლასიკური რეპიდან გაცილებით მელოდიურ და დახვეწილ სტილში გადაიზარდა, ხოლო მის ჰიტს “See You Again” Spotify-ზე 3 მილიარდზე მეტი მოსმენა აქვს.
ლიმიტირებული ტირაჟი და ექსკლუზიური ავტოგრაფები
საკოლექციო მაისურები ტრადიციულად ხელმისაწვდომი იქნება Barça Store-ებში, კლუბის ოფიციალურ ონლაინ პლატფორმაზე, Nike.com-ზე, Nike-ის შერჩეულ ფილიალებსა და SNKRS-ზე:
- 1899 ერთეული: კლუბის დაარსების წლის სიმბოლურად, გაიყიდება მატჩის უმაღლესი ხარისხის (Matchday quality) ლიმიტირებული რაოდენობა;
- 22 სუპერექსკლუზიური მაისური: შეზღუდული ვერსია, რომელზეც ელ კლასიკოსა და Liga F-ის შეხვედრების სასტარტო და სათადარიგო შემადგენლობის ფეხბურთელების ხელმოწერები იქნება დატანილი;
- 11 განსაკუთრებული ეგზემპლარი: გაიყიდება მხოლოდ 11 მაისური, რომლებიც უშუალოდ Tyler, The Creator-ის პირადი ავტოგრაფით იქნება დამშვენებული.
ტანსაცმლის სრული კოლექცია და მუსიკალური საღამო
GOLF WANG-ის ესთეტიკა – მკვეთრი ფერები, დახვეწილი დეტალები და სპორტული ტანსაცმლის არასტანდარტული ხედვა – პროდუქციის ფართო ხაზში აისახა. კოლექცია მოიცავს ბომბერ ქურთუკს, რეტრო სპორტულ კოსტიუმს, ლეოპარდის პრინტიან ნაკრებს, ბამბის მაისურებს, ჰუდებს, წინდებს, ნაქსოვ ქუდს, წყლის ბოთლსა და საკოლექციო შარფს. თითოეულ ნივთზე “ბარსელონასა” და GOLF WANG-ის კოლაბორაციული სიმბოლიკაა დატანილი. პროდუქცია გაიყიდება როგორც ონლაინ, ისე GOLF-ის მაღაზიებში ლოს-ანჯელესში, ნიუ-იორკში, ტოკიოში, სიდნეისა და ლონდონში.
თანამშრომლობის აღსანიშნავად, 24 ოქტომბერს ბარსელონაში მუსიკალური საღამო Copa De Golf გაიმართება, სადაც ფეხბურთი, მოდა და მუსიკა გაერთიანდება. მთავარი დიჯეის ამპლუაში Yung Taco წარდგება, რომელსაც მხარს Bexnil, Alu Nuenga, Duna და Mushkaa დაუჭერენ.
გარდა ამისა, 23 ოქტომბრიდან ეს ფორმა ვირტუალურ სივრცეშიც გადაინაცვლებს და ხელმისაწვდომი გახდება KONAMI-ს ვიდეოთამაშში eFootball™.
Tyler, The Creator რიგით მეცხრე არტისტია, რომლის ლოგოც “ბარსელონას” მაისურზე განთავსდება. მანამდე ეს პატივი ოლივია როდრიგოს, ედ შირანს, ტრევის სკოტს, Coldplay-ს, Karol G-ს, The Rolling Stones-ს, როზალიასა და დრეიკს ერგოთ.
მხარეთა ოფიციალური კომენტარები
ჟოან სოლერმა, “ბარსელონას” კომერციული მიმართულების ვიცე-პრეზიდენტმა, თანამშრომლობის მასშტაბი შეაფასა:
“ბარსელონასა და Spotify-ს თანამშრომლობა აგრძელებს ახალი ხიდების გადებას ფეხბურთს, მუსიკასა და თანამედროვე კულტურას შორის. ელ კლასიკოს მაისურზე Tyler, The Creator-ის გამოჩენით, ჩვენ განვავითარებთ ინიციატივას, რომელიც ამ მატჩის მოლოდინის განუყოფელ ნაწილად იქცა და გვაძლევს საშუალებას, მივწვდეთ აუდიტორიას მთელ მსოფლიოში. ეს გააქტიურება კიდევ უფრო აძლიერებს ჩვენი პარტნიორობის უნიკალურ ბუნებას და ხაზს უსვამს მუსიკისა და ფეხბურთის ძალას – გააერთიანოს ადამიანები”.
მარკ ჰაზანმა, Spotify-ს მარკეტინგისა და პარტნიორობის უფროსმა ვიცე-პრეზიდენტმა, აღნიშნა:
“ყველა წინა პროექტმა ახალ სიმაღლეზე აგვიყვანა, თუმცა ეს შემთხვევა სრულიად განსხვავებულია. ტაილერს ამ თანამშრომლობაში გამორჩეული შემოქმედებითი სამყარო შემოაქვს, რაც მხოლოდ მაისურით არ შემოიფარგლება. კამპანიის ვიზუალებიდან და კოლექციიდან დაწყებული, ბარსელონაში დაგეგმილი ღონისძიებით დასრულებული, თითოეული ელემენტი GOLF WANG-ის ფილოსოფიას ეფუძნება, რაც მას ‘ბარსელონასთან’ ერთ-ერთ ყველაზე საინტერესო კოლაბორაციად აქცევს”.
ბრენდ GOLF WANG-ის ოფიციალურ განცხადებაში კი ნათქვამია:
“მსოფლიოში ძალიან ცოტაა ელ კლასიკოზე დიდი სცენა. GOLF WANG-ის ხილვა ისეთი გლობალური ბრენდების გვერდით, როგორებიც FC Barcelona და Spotify არიან, სპორტის, მუსიკისა და მოდის კოლაბორაციაში ახალ ნიშნულს აწესებს და ამ სამყაროებს ისე აერთიანებს, როგორც ეს მხოლოდ GOLF WANG-ს შეეძლო”.
forum კომენტარები (0)