30 ივნისი “ბარსელონას” სპორტული და ეკონომიკური დაგეგმარებისთვის საკვანძო თარიღია. კატალონიური კლუბი გადამწყვეტი დღის წინაშე რამდენიმე მიზეზის გამო დგას: ეს იქნება ბოლო დღე, როდესაც დახურული გარიგებები მიმდინარე სეზონის ეკონომიკურ ბალანსში აისახება. ამასთან, ამ თარიღის შემდეგ ზოგიერთი ტრანსფერის ფასი გაიზრდება და, გარდა ამისა, რამდენიმე ფეხბურთელს კონტრაქტი უმთავრდება. ყოველივე ეს კლუბს აიძულებს, დააჩქაროს მოქმედებები, რათა ფინანსური წლის დახურვას შესრულებული სამუშაოს დიდი ნაწილით შეხვდეს.
ყურადღების ცენტრში: გუნდიდან წასვლები
ერთ-ერთი მთავარი ფოკუსი გუნდიდან წასულების საკითხს ეთმობა. ნებისმიერი დამატებითი შემოსავალი ფუნდამენტურია კლუბის ფინანსური მდგომარეობის გასაუმჯობესებლად და ზაფხულის სატრანსფერო ბაზარზე მანევრირების მეტი სივრცის მოსაპოვებლად. მაგიდაზე რამდენიმე კონკრეტული სახელი დევს: ანსუ ფატი, რუნი ბარდჯი, მარკ კასადო, მარკ-ანდრე ტერ შტეგენი და ინიაკი პენია.
ანსუ ფატის შემთხვევაში, “მონაკომ” 11 მილიონ ევროს გამოსასყიდი ოფციის გააქტიურების სურვილი ჯერ კიდევ რამდენიმე კვირის წინ გამოთქვა. მიუხედავად ამისა, გარიგების დასახურად გარკვეული დეტალებია მოსაგვარებელი. ორივე კლუბი მოლაპარაკებებს აწარმოებს მომავალი გაყიდვიდან იმ პროცენტზე, რომელსაც “ბარსელონა” დაიტოვებს, ასევე შესაძლო გამოსყიდვის პუნქტის ჩართვაზე, რაც კლუბს საშუალებას მისცემს, თავდამსხმელის მომავალზე გარკვეული კონტროლი შეინარჩუნოს.
ღია რჩება მარკ კასადოს სიტუაციაც. ნახევარმცველი საკუთარ მომავალზე საბოლოო გადაწყვეტილების მიღებამდე სხვადასხვა ალტერნატივას განიხილავს. ამასობაში, რუნი ბარდჯის პროგრესის გასაგრძელებლად გუნდიდან წასვლა სურს (სავარაუდოდ, იჯარის სახით), თუმცა მისი დანიშნულების ადგილი ჯერ დაზუსტებული არ არის.
ინიაკი პენიას ტრანსფერი გარდაუვალია
კიდევ ერთი ძალიან დელიკატური საკითხი ტერ შტეგენს ეხება. გერმანელი მეკარე რჩება ერთ-ერთ სახელად, რომელიც ყველაზე დიდ გაურკვევლობას იწვევს. მის შემთხვევას ემატება ინიაკი პენიაც, რომლის წასვლაც გარდაუვალი ჩანს. ალიკანტელი მეკარე “პანათინაიკოსში” გადასასვლელად და “ბარსელონაში” თავისი ეტაპის დასასრულებლად ბოლო დეტალებს აგვარებს. მოსალოდნელია, რომ ტრანსფერი უახლოეს საათებში ოფიციალურად გამოცხადდება.
შენაძენები და ხორხე სალინასი
რაც შეეხება შენაძენებს: “ბარსელონას” ხორხე სალინასის სახელი მკაფიოდ აქვს მონიშნული. კლუბი ამ ოპერაციას სტრატეგიულად მიიჩნევს და მის 30 ივნისამდე დასახურად მუშაობს. მიზეზი წმინდად ეკონომიკურია: ამ თარიღამდე ტრანსფერის დასრულება შესაძლებელია ოთხიდან რვა მილიონ ევრომდე თანხით, მაშინ როცა პირველი ივლისიდან მისი გამოსასყიდი პუნქტი 16 მილიონამდე გაიზრდება.
კონტრაქტების ამოწურვა
და ბოლოს, მომავალი კვირის სამშაბათს კლუბთან კონტრაქტი ოთხ მოთამაშეს უმთავრდება. ლევანდოვსკი უკვე დაემშვიდობა “ბარსელონას”, ხოლო სპორტულმა დირექციამ გადაწყვიტა, მარკუს რაშფორდის გამოსასყიდი ოფცია არ გაააქტიუროს.
განსხვავებული სცენარია კრისტენსენისა და კანსელუს შემთხვევაში. დანიელ მცველს მაგიდაზე განახლების შეთავაზება უდევს, რომელსაც ხელი, დიდი ალბათობით, უახლოეს მომავალში მოეწერება. უფრო რთულია პორტუგალიელი ფლანგელის სიტუაცია, რომლის მომავალიც გარიგების ეკონომიკური მოთხოვნების გამო კვლავ გაურკვეველია. “ბარსელონა” გადამწყვეტი ათვლის რეჟიმშია. სპორტული დირექცია და ეკონომიკაზე პასუხისმგებელი პირები დროს ებრძვიან.
კომენტარები (0)