ბარსელონა ოთხ რეკორდს უმიზნებს

“ბარსელონას” ლა ლიგის მოგებას რამდენიმე ტურში გაინაღდებს და ტიტულისთვის ბოლო ტურებამდე ბრძოლა არ მოუწევს, თუმცა ჩავის გუნდს რამდენიმე რეკორდის დამყარების შანსი ექნება, რისთვისაც სეზონის ბოლომდე მაღალ დონეზე თამაშია საჭირო.

Mundo Deportivo-ს ინფორმაციით, კატალონიური კლუბი 4 ისტორიულ შედეგს უმიზნებს.

საუკეთესო დაცვითი შედეგი ლა ლიგაში

მიმდინარე სეზონში “ბარსას” წარმატების მთავარი მიზეზი დაცვაა – კლუბმა ლა ლიგის 28 ტურში მხოლოდ 9 გოლი გაუშვა და თუ დარჩენილ ტურებში 8 გოლზე მეტს არ გაუშვებს, 2015/16 წლების “ატლეტიკოს” შედეგს გააუმჯობესებს, რომელმაც საკუთარი კარში 18 ბურთი მიიღო.

საუკეთესო დაცვითი შედეგი ევროპაში

ევროპის ტოპ 5 ჩემპიონატში საუკეთესო დაცვითი შედეგი 2004/05 წლების სეზონის “ჩელსის” ეკუთვნის. მოურინიოს გუნდმა მხოლოდ 15 გოლი გაუშვა. “ბარსამ” ამ რეკორდის მოხსნისთვის დარჩენილ 10 მატჩში 5 გოლზე მეტი არ უნდა გაუშვას.

ყველაზე მეტი ქულა ლა ლიგის ისტორიაში

ლა ლიგის ისტორიაში სარეკორდო ქულა 100-ია, რომელიც “რეალ მადრიდმა” (2011/12) და “ბარსელონამ” (2012/13) დააფიქსირეს. “ბარსას”, რომელსაც ამჟამად 72 ქულა აქვს, საკუთარი შედეგის გაუმჯობესებისთვის დარჩენილი 10 მატჩის მოგება სჭირდება, 9 შეხვედრის მოგებისა და ერთის ფრედ დასრულების შემთხვევაში კი რეკორდს გაიმეორებს.

ყველაზე მეტი მოგება ლა ლიგის ისტორიაში

ქულების მსგავსად, ყველაზე მეტი, 32, მოგებაც “ბარსასა” და “მადრიდს” ეკუთვნით. “ბარსამ” ამ რეკორდის მოხსნისთვის დარჩენილი 10 მატჩი უნდა მოიგოს.