ბარსელონა ისტორიულ ანტირეკორდს უახლოვდება

მიმდინარე სეზონი “ბარსელონასთვის” გამორჩეულად ცუდი რომაა, ამაზე ყველანაირი სტატისტიკა მეტყველებს. ჩემპიონთა ლიგაზე ჯგუფში ჩარჩენასთან ერთად, გუნდი ისტორიული ანტირეკორდის დამყარებასთანაა ახლოს. 

5 ტურის შემდეგ გატანილი 2 გოლი კლუბის ისტორიაში ყველაზე ცუდი შედეგია. გაუმჯობესების შანსები კი ძალიან მცირეა.

“ბლაუგრანას” ჩემპიონთა ლიგის ჯგუფურ ეტაპზე საშუალოდ 13.1 გოლი გააქვს, ანუ 2.18 გოლი ერთ მატჩში. წელს ეს მაჩვენებელი 0.4-მდეა შემცირებული – 2 გოლი 5 თამაშში. უარესი შედეგი ტურნირის მონაწილე 32 გუნდიდან მხოლოდ სამს აქვს: კიევის “დინამოს” (0.2), “მალმიოსა” (0.2) და დონეცკის “შახტარს” (0.25).  

“ბარსას” რეკორდი ჯგუფურ ეტაპზე 20 გოლია – კლუბმა ეს შედეგი 2011/12 და 2016/17 წლების სეზონებში, პეპ გვარდიოლასა და ლუის ენრიკეს მწვრთნელობის ბოლო წლებში, დააფიქსირა.

ანტირეკორდი კი 7 გოლს ითვლის. პირველად, 1997/98 წლების სეზონში ლუი ვან გაალის “ბარსელონას” 7 შედეგიანი დარტყმა ჯგუფიდან გასასვლელად არ ეყო, მეორედ კი – 2009/10 წლებში 7 გოლით “ბარსამ” პირველი ადგილი დაიკავა და იმ სეზონში ნახევარფინალშიც გავიდა.

წელს “ლურჯ-ბროწეულისფრებმა” მეტოქეთა კარის ბადე სულ ორჯერ შეარხიეს, რაც იმას ნიშნავს, რომ გუნდს ახალი ანტირეკორდის თავიდან ასაცილებლად “ბაიერნთან” მინიმუმ 5 გოლის გატანა სჭირდება.

თუმცა “რეკორდმაისტერთან” 5 გოლს არავინ ითხოვს, მთავარი მიზანი ჯგუფიდან გასვლაა, რისთვისაც უბრალოდ მოგებაც საკმარისია. სხვა შემთხვევაში, ჩვენ ბედს “ბენფიკასა” და კიევის “დინამოს” მატჩის შედეგი გადაწყვეტს.