ლუის სუარესის გაყიდვის დადებითი და უარყოფითი მხარეები

ბოლო პერიოდში, ურუგვაელის გუნდიდან წასვლის შესახებ რამდენიმე ჭორი გავრცელდა. მათ შორის უკანასკნელი ლუის სუარესის “სან ლორენცოში” ტრანსფერს უკავშირდებოდა. “ბარსას” თავდამსხმელის პროდუქტიულობამ ასაკის მატებასთან ერთად იკლო. გარდა ამისა, ტრავმებიც აწუხებს. ლუისის წასვლა ნაკლებად სავარაუდოა,  თუმცა, შესაძლოა, მის ტრანსფერს უარყოფითთან ერთად, დადებითი მხარეებიც ჰქონდეს.

დადებითი

1) ურუგვაელი უკვე 33 წლისაა და კარიერის პიკი წარსულში მოიტოვა.

2) პანდემიის გამო კლუბმა ფინანსურად საკმაოდ იზარალა. კატალონიელებს დეფიციტის აღმოსაფხვრელად ფეხბურთელების გაყიდვა სჭირდებათ, მათ შორის საკვანძო მოთამაშეებისაც.

3) სუარესის დიდი ხელფასის თავიდან არიდება “ბარსას” ფინანსურად წაადგება.

უარყოფითი

1) “ელ პისტოლერო” გუნდში საუკეთესო თავდამსხმელია. ჩატარებულ 23 შეხვედრაში შედეგიანობით იგი მხოლოდ ლეო მესის ჩამორჩება. სუარესის ანგარიშზე 14 გოლთან ერთად, 11 საგოლე გადაცემაა.

2) სამწვრთნელო შტაბი სუარესს შემადგენლობის უმნიშვნელოვანეს წევრად მიიჩნევს. იგი გუნდის ერთ-ერთი ლიდერია, როგორც მოედანზე, ასევე მის მიღმაც.

3) ურუგვაელის გაყიდვა მესიზე ცუდად იმოქმედებს. ისინი საკმაოდ ახლო მეგობრები არიან და უკვე დიდი ხანია ეს ურთიერთობა აკავშირებთ.

ჯერჯერობით უცნობია, ფიქრობს თუ არა ლუისი “ბარსელონას” დატოვებაზე. მას კონტრაქტი 2021 წლამდე აქვს გაფორმებული. თუმცა, ხელშეკრულებაში მითითებულია პუნქტი, რომლის მიხედვითაც მას კლუბში დარჩენა 2022 წლამდე შეეძლება. 

RAC1-თან მიცემულ ინტერვიუში ურუგვაელმა საკუთარ მომავალზე მცირე კომენტარი გააკეთა:

“რასაკვირველია, კარიერის აქ გაგრძლება მსურს, თუმცა ეს ყოველივე მხოლოდ ჩემზე დამოკიდებული არაა. კონტრაქტში მითითებული პუნქტის მიხედვით, თუ მომდევნო სეზონში მატჩების 60%-ში მივიღებ მონაწილეობას, 2022 წლამდე ისევ “ბარსაში” თამაშს შევძლებ.”