ერერა: “ბარსელონას” მხარს მას შემდეგ აღარ ვუჭერ, რაც პოლიტიკური და სოციალური იდეების მსახური გახდა

ესპანეთის ერთ-ერთმა წამყვანმა ჟურნალისტმა, კარლოს ერერამ, აღიარა, რომ “ბარსელონას” აღარ უჭერს მხარს, მას შემდეგ, რაც კლუბი პოლიტიკური და სოციალურ საქმიანობაში ღიად ჩაერთო.

ერერა “ბარსას” ფანი ჯერ კიდევ მაშინ გახდა, როდესაც ძალიან პატარა იყო და აღნიშნავს, რომ კლუბთან ასეთ კავშირს ვეღარ გრძნობს.

“მე ბარსელონაში გავიზარდე, მამაჩემი ამ კლუბის ფანი იყო. შეიძლება ითქვას, რომ 70-ან წლებში, განათლება “კამპ ნოუზე” მივიღე. პრობლემა ის არის, რომ როდესაც ამხელა კლუბი თანხმდება პოლიტიკურ და სოციალურ იდეებს ემსახუროს, ის მე აღარ წარმომადგენს.” – საუბრობს ერერა Cadena Cope-თან.

ერერამ გაიხსენა პირველი შეხვედრა, რომელსაც ის “კამპ ნოუზე” დაესწრო.

“ბარსელონამ” 4-0 მოიგო, იოჰან კრუიფმა ორი გოლი გაიტანა და ორი საგოლე გადაცემა შეასრულა. ჩვენ ეიფორიაში ვიყავით, უცხო ადამიანებს ვეხუტებოდით და ვყვიროდით, რომ მსგავსი ფეხბურთელი არასდროს გვინახავს, კრუიფის მოედნის ხედვა და თამაშის სწრაფად ორგანიზების უნარი უნიკალური იყო. მას მერე, სხვა ფეხბურთელში ეს არასდროს შემინიშნავს.”