არტურო ვიდალმა “ბარსელონას” სასამართლოში უჩივლა

არტურო ვიდალმა “ბარსელონას” სასამართლოშუ უჩივლა, იტყობინება ესპანეთის ერთ-ერთი ყველაზე პოპულარული გამოცემა ABC.

წყაროს ცნობით, ვიდალი კლუბისგან 2.4 მილიონ ევროს ითხოვს (მის კონტრაქტში გაწერილი ბონუსების თანახმად):

• დაახლოებით 2 მილიონი ევრო იმის გამო, რომ მან ოფიციალური მატჩების 60%-ში მიიღო მონაწილეობა;
• 1.4 მილიონი ევრო იმისთვის, რომ გუნდი ჩემპიონთა ლიგის 1/8 და 1/4 ფინალში გავიდა;
• 250 000 ევრო იმისთვის, რომ გუნდმა ლა ლიგა მოიგო.

არტუროს ადვოკატები მიიჩნევენ, რომ ჩილელმა ნახევარმცველმა პირველი პუნქტის მიხედვით გაწერილი თანხის (2 მილიონი ევრო) უმეტესი ნაწილი უნდა მიიღოს. მეორე და მესამე პუნქტიდან კი 2.8 მილიონი ევროს მიღებას გეგმავენ. სულ – 4 097 500 ევრო. ვიდალი ამტკიცებს, რომ კლუბმა მას ამ თანხი ნახევარი გადაუხადა და კიდევ 2.4 მილიონი ევროს მიღებას ითხოვს.

თავის მხრივ, “ბარსელონა” ამტკიცებს, რომ ფეხბურთელს ოფიციალური მატჩების 60%-ში მონაწილეობა არ მიუღია (იმისათვის, რომ მატჩი აქტივში ჩაგეწეროს, 45 წუთზე მეტი უნდა ითამაშო). ასევე, კლუბის ადვოკატები თვლიან, რომ ჩემპიონთა ლიგის ბონუსი ერთჯერადი პუნქტია. ეს თანხა ვიდალმა გასულ სეზონში უკვე მიიღო. რაც შეეხება ლა ლიგის ბონუსს, კლუბმა ეს თანხა არტუროს გადაუხადა.

“ბარსელონაში” თვლიან, რომ ფეხბურთელის ეს ქმედება მის შესაძლო ტრანსფერთანაა დაკავშირებული, რადგან გასულ სეზონში ვიდალი მიღებული ბონუსებით კმაყოფილი იყო.

შეგახსენებთ, რომ იტალიურ პრესაში გავრცელებული ინფორმაციით, არტურო “ინტერში” გადასვლას დასთანხმდა.