“ბარსელონას” ვიქტორ ვალდესის შემცვლელის დანიშვნის უფლება ჯერ არ აქვს

მიუხედავად იმისა, რომ “ბარსელონამ” 19-წლამდელთ გუნდის მთავარი მწვრთნელი ვიქტორ ვალდესი კლუბიდან 7 ოქტომბერს გაათავისუფლა, კატალონიელები მისი შემცვლელის ოფიციალურად დანიშვნას ჯერ კიდევ ვერ ახერხებენ.

Marca-ს ცნობით, ვალდესს მისი გათავისუფლების გადაწყვეტილებაზე ხელი არ მოუწერია, რის გამოც, ეს გადაწყვეტილება ძალაში მისი გამოცემიდან 21 დღის შემდეგ შევა. ამის შემდეგ შეძლებს “ბლაუგრანა” ვალდესის შემცვლელის ოფიციალურად დანიშვნას.

დღეს, ახალგაზრდულ ჩემპიონთა ლიგაზე, “ბარსელონა” “სლავიას” დაუპირისპირდება და ვალდესის შემცვლელი ფრანკ არტიგა ამ მატჩში გუნდის მთავარი მწვრთნელი ვერ იქნება.

ამ საკითხთან დაკავშირებით კომენტარს აკეთებს თავად ფრანკ არტიგა: “უსიამოვნო სიტუაციაა შექმნილი. ოფისში ვიქტორთან ერთად ვმუშაობდი და მასთან ყოველთვის კარგი ურთიერთობა მქონდა.”